Advisor Imtikümzük alima nungi pilaogo; Sep. 25 nü asüpila sentong agitsü

Dimapur, Rongjui (September) 22 (TYO): Taoba election nung Aonglenden assembly constituency nungi NDPP telok nungi adoksang Wb. Imtikümzük kenpiga temang mejungi arur Honibar nikongdang 5:30 ako shi nung Apollo Hospital, New Delhi nung süogo.
Pa ya tang PDA government nung Excise & Sericulture department ana nung Advisor liasü. Taoba government mapanga pa Deputy Speaker aser IPR department nung Parliamentary Secretary liasü.
Angazükba agi, pa ya tezüng nung timtem aliba agi Apollo Hospital, New Dehi nung anepaludakja liasü.
Asür Imtikumzuk indang mang Deobarnü (September 23) Dimapur airport tonga bener arutsü aser idak nung jagi tsüngsang jungra helicopter ajanga mesüra gari lenmang ajanga Kohima-i bener atutsü.
Deobar aonung Kohima nung mang ayuba sülen Hombarnü gari ajanga Mokokchung-i bener aotsü aser Mongulbarnü (September 25) pa tasoyim Ungma nung pa den state funeral agitsü.
Nagaland Goveror P.B. Acharya-i Sericulture & Excise Advisor aser taoba Deputy Speaker Imtikumzuk Longkumer ajungbena asüba osang angashia kanga aoksaba metetdaktsü.
Asür Imtikumzuk-i Nagaland Legislative Assembly züngsem ka ama Nagaland nung alirtem ajungkettsü atema mapa inyakogo aser itemji teti bilemtettsü. Pa asüba ajanga Nagaland nung lennir tajung aser takotet ka samaogo, ta Governor Acharya-i sangdong ka nung ashi.
Governor-isa tasür kibong den asükhu lemsatep aser Tsüngremi tashi aser tesünep agüjang ta sarasademtsüba metetdaktsü.
Nagaland Chief Minister Neiphiu Rio-ia sangdong ka nung Sericulture & Excise Advisor Imtikumzuk asüba osang angashia kanga aoksar aser temulung raksar ta metetdaktsü.
Asür Imtikumzuk ya yimsüsür tajung ka liasü aser asen state indang yimtenren mapa nung jenjang ka amenteta lia pai iba lima toktsür ogo. Pai mezüngbuba election nung tamakok angu saka 2013 aser 2018 nung atongtepa 26 Aonglenden Assembly Constituency nungi takok angu, ta Rio-i ashi.
Asür Imtikumzuk ji Nagaland Legislative Assembly nunga Deputy Speaker inyak. Ni mapang talangka Ungma yimtsüng den sendaktepa aser ka ama bilema inyaka aruba nung pa shilem ka liasü aser ni pa teti bilemtettsü, ta chief minister-isa metetdaktsü.
Pai anojungi iba lima toktsür aoba ajanga Nagaland atema ongdang tulu ka adokdaktsüogo. Pa asübaji par kibong, yimtsüng aser party atema takoksa ulura lir. Onoki pa mangyimer. Pa ya sorkar atema aser NDPP atema tongtipang nisung ka liasü aser pa malibaji kanga metettsü, ta Rio-isa shisem.
“Iba asükhu mapang Nagaland sorkar nung aser ozü kibong tenüng nung ni asür kibong den mangyim tejashi lemsateper. Tulusang Tsüngremi nenok den denangma aser tasür tanüla anisüngzük ngudakjangma ta sarasademer” ta Nagaland Chief Minister-isa ashi.
Taoba Chief Minister aser tang Opposition lennir T.R Zeliang-ia Aonglenden constituency nungi MLA Imtikumzuk asüba osang angashia aoksaba aser temulung raksaba metetdaktsüogo.
Asür Imtikumzuk ya 12 buba Nagaland Legislative Assembly nung mezüng INC ticket nung takok angu aser iba sülen NPF nung aden. Iba mapang pai Parliamentary Secretary aser Deputy Speaker ka ama kanga dang takok ngua inyak aser 13 buba NLA nunga pa Advisor ka ama teinyakdak nung alima nungi pilaogo, ta TR Zeliang-i sangdong ka nung metetdaktsü.
“Ni tanü amshiba social media pages ya Imtikumzuk-i lapoktsüba lir aser ni ibaji kodanga mamatsü. Pai mapa tajung inyakba atema kanga pelar aser asenoki pa teti bilemtettsü. Pai toktsür aoba kinungtsü Smti Imkongzenla aser tanurtem aser kinunger ajak den asükhu lemsateper,” ta paisa metetdaktsü.
Maneni, Ungma Senso Telongjem Mokokchung (UST), Rajya Sabha MP KG Kenye, Temjen Imna Along-i Bharatiya Janata Party Nagaland tenüng nung, Ricky Ozukum IPR Secretary-i NPP Nagaland State tenüng nung aser NDPP President Chingwang Konyak-i NDPP tenüng nung asür Imtikumzuk asüba atema aoksaba aser mangyimba osangtem sangdong balala nung metetdaktsüogo.