MLA ka kidang nungi pistol apu

Imphal, Chiteni July 31 (Agencies): Nisung ajak rongmesotsü tatalokba ka nung National Investigation Agency (NIA) team kati Tentonü anepdang Imphal kübok Mantri Pukhuri tesem nung Manipur Congress MLA Yamthong Haokip’er ki meita aoba mapang pistol pongu tashi ngutetogo. Congress MLA ya Saikul Assembly constituency nungi lir.
2 Manipur Rifles arms kote nungi 9 mm pistol 56 samaba ken o dak sendakba nung state sorkari NIA nem ken o bushisüngdangtsü asoshi temelaba agütsüba nung shilem ka ama iba meita aoba sentong ya ayongzüka aka.
Manipur Rifles (MR) garrison, prangbong injang ayuba tesem nung pistol tem samaba sülen state sorkari taoba mapang nung IPS officer ka densema police ketdangser tejen pezü tashi mapa nungi anentsüogo.
Manipur sorkari 2014 küm Rongjui/Sept 11 nü State security force tem amshitsü atema 9mm pistol 570 ali. Ajisüaka prangbong injang ayuba tesem nungi 9 mm pistols 56 den magazine 59 samar aliba ngutet, koba mapang ajak nung nüka alir.
Pistol samaba ya 2nd MR commandant, P Manjit-i, unit aser police head quarters (PHQ) Pool anaprongla indang prangbong injangtem kwi ali aji metettsü asoshi asadangba mapang ngutet. Iba sülen pai police station nung FIR ka benok.
Tang tashi nung iba ken o nung sendaka alitsü ta temulung melemi bilemba nisung pongu pua lir. Parnok rongnung MR personal ana aser Kuki telungpur ka densema lir.
Manipur Chief Minister N Biren Singh-i Centre dang iba ken o NIA nem bushisüngdang südaktsütsü asoshi asüngdanga liasü aser Monupi/May 30 nü Union Ministry of Home Affairs-i NIA nem iba ken o bushisüngdang asütsü asoshi tetuyuba agütsü.