MLA Kezhienyi Khalo-i Chizami Sub-Division HoOs tem ajuru

MLA, Kezhienyi Khalo den SDO (C) Chizami aser ketdangsertem telongjem senden ka Chizami nung Metsüremi 28, 2018 nü agir tangokba noksa nung angur.

Dimapur, Metsüremi 29 (TYO): 17th Chizami A/C nungi MLA, Kezhienyi Khalo-i Chizami Sub-Division kübok Head of Offices (HoOs) ajunga den Metsüremi (March) 28, 2018 anogo telongjem senden ka amen aser iba senden ya Chizami SDO (C), Renbomo-i ketdangsüa agi.
Iba senden nung arua adenertem dang Khalo-i pelaba lemsatep aser nüburtem ajangzüktsü atema bendanga agütsür inyaktsü ajungshi.
“Mapa-i marurtem aser mapa shidak meinyakertem nem temerenshi agütsütsü ni arendaka malitsü, anungji circle nung sorkar mapa inyakertem tali bendanga agütsüshir pei mapa meranga inyaktsüla,” ta MLA Khalo-i tekümdangtsü ashi.
Pai-sa sorkar tenzükertem ama bendanga agütsür nübur tenzüktsü aser nüngdakba ajak nung yaritsü, ta shisem. Pai-sa department balala nung staff agi meperiba, staff quarter, tzü aser electricity peria maliba indang süoki ia reprangtsü, ta iba senden nung ashi.