MLA lirkati Shurhozelie mapa aitsür

Kohima, Jul 9 (TYO): T.R.Zeliang chief minister kümdaktsünertem MLA 41-i Dr.Shurhozelie-i pa den MLA 10 yur chief minister menden medoktsüi inyakbaji democarcy anema lir ta aitsüogo.
India ya temzüng ozüng tejangja lateta akaba democratic lima ka lir aser iba ama yimten ka nung Dr.Shurhozelie ama yimten nung tain kati mangateti nübortem matsüngdang inyakbaji pai inyaker memesük ta parnokisa aitsü.
Dr Shurhozelie ya MLA mesüaka MLA-temi pa nem maongka tulu agüja ita trok atema chief minister kümdaktsü. Ajisüaka, iba mapang tatsüka tsüngda nung pai yimten tashi aginüba aser kinunger tejak repranga inyakba jaklatem jungkai adoka sayuogo, ibaji Indian democracy anema lir ta Dr.Shurhozelie maginertemisa metetdaktsü.
Pa NPF President asüba agi, pa sünütsü süa party MLA aser minister aser parliamentary secretary-tem anentsübaji tim masü, kechiyong parnokji nübortemi shimtetba purtem lir ta parnokisa ashi.
Ajisüaka, Dr. Shurhozelie Liezietsu-i inyakba mapatemji nübortemi aremzüka atatsü mepishir, kechiyong tekaratiba nung government tasen ka akümtsü inyaktepdagi ta T.R.Zeliang nungitertemisa metetdaktsü.
Onok nükjidongji nübortem nüngdak inyaktsüner, anungji Dr.Shurhozelie-ji Chief minister menden nungi alutsüla ta parnokisa metetdaktsü.
Iba ama mapang ka nung nübortem nem timtem agütsüba atema sasar ta parnokisa metetdaktsü.
Dr.Shurhozelie melena T.R.Zeliang chief minister kümdaktsüner MLA-temji itemi liasü: Y. Patton, G. Kaito Aye, Nuklutoshi, Neiba Kronu, Dr. Nicky kire, Dr. Benjongliba Aier, Zhalie-o Rio, Tokheho Yepthomi, S. Hukavi Zhimomi, C. Kipili Sangtam, C M Chang, S. Pangyuh Phom, Dr. Neiphrezo Keditsu, Shetoyi Sema, Merentoshi R. Jamir, Imkong L. Imchen, Dr. Longrineken, Naiba Konyak, S I Jamir, Deo Nukhu, C. Apok Jamir, EE Pangteang, Pukhayi Sumi, Kejong Chang, B S Nganglang, L. Khumo, Kropol Vitsu, E. Eshak Konyak, Namri Nchang, S Chuba Longkumer, Toyang Changkong Chang, Picto Shohe, Amenba Yaden, Y M Yollow, Imtikumzuk, Paiwang Konyak, N. Thomas Lotha, , Tovihoto Ayemi, Levi Rengma aser Vikho-o Yhoshuü.
Ano, osang ka ajanga angazükba agi, T.R.Zeliang oagi Delhi nung Nagaland governor, Acharya aser prime minister, Narendra Modi nungertem ajurutsü asoshi Kaziranga nungi Delhii ogo.