MLA & MP tem asadangtsü indang mobile app saya

New Delhi, Luroi (August) 24 (Agencies): Taoba Tir Pranab Mukherjee-i National Electoral Transformation (NETA) mobile application sayatsüogo.
Iba sabang nung voter temi pei shimtetba MLA aser MP temi inyakba mapatem meyipa reprangtettsü aser parnok dak tai aputsü akok.
“Vote agütsür teindang, lennir tajung, tashishitsü melii aser ochishia mapa inyakba medeni democracy ka moutettsü” ta tanü Mukherjee-i mobile app sayatsüdang ashi.
Iba app ya arishi küm 27 tain entrepreneur Pratham Mittal-i yanglutetba lir.
Iba app ya US indang approval system ajanga ajungmesoa yanglu aser app amshirtemi MLA aser MP tem nem asadangtsü akok.
Iba app ajangasa linük kübok constituency balala nung voter tem tebilemba metettsü akok. Iba app nung shilem agitsü atema IVR calls, SMS aser ASHA o anganwadi workers-i data bendentsü atema offline activation tem densema lir.
Iba app ya mezüng taküm February ita Rajasthan kübok Ajmer aser Alwar constituency indang by-elections nung amshidanga liasü. Iba sülen May ita Karnataka assembly elections nung amshi.
NETA app indang beta version nung voter crore 1.5 dak tema register süa lir. Taoba ita 8 tsüngda parliamentary constituency 543 aser assembly constituency 4,120 nung lennirtem asadangogo aser meyipa reprangogo.
NETA app ya Android, iOS aser oshi 16 nung web nung angutsü.
NETA app sayaba sentong nung Delhi Chief Minister Arvind Kejriwal aden aser pai ashiba agi, “India ya democracy tulu ka lir aser nübortemi kin, tamangba yimsü aser tanga tangatetba nung ajemdaker vote agütsür.”
“Nisung aikati peii shimtetba MLA/MP den majurutepdang lir aser iba ama tensa ka nung iba app ajanga candidate aser parnoki inyakba mapa indang osang voter nem metetdaktsütsü. Iba app yagi party aser nübortem nem teyari agütsütsü” ta Kejriwal-isa ashi.