MLA Nakhro-i Jotsoma süngküm lapoktsü

Dimapur, Luchii/December 9 (TYO): 8th Western Angami Assembly Constituency MLA Keneizhakho Nakhro-i December 9 nü Jotsoma yimtsüng among den Bypass lenmang lapoktsüogo. Yimtsüng süngküm ya Thejavakhrie Tshü,’ (yimtsüng nung arishi küm 60 nungi 65 tsüngda alirtemi tentetba telok) teloki yanglu.
Süngküm lapoktsüba sentong nung MLA, Nakhro-i, yimtsüng süngküm yangluba ya kaga tongtibang lir, kechiyong iba ajanga Jotsoma litsü jangjatsür aser kidanger yimtsüngtem den arrtsü dak sendakba nung mangatettep adoktsü nungi jenboa toktsür, ta ashi.
‘Thejavakhrie’ telok nung züngsem timba arishi küm 60 adener liaka parnoki iba mapa agizüka inyakba atema Nakhro-i parnok nem tenüngsang agütsüba den iba tatishitsü aketba mapa ya yimtsüng leniba tesangwa asütsü, ta ashi.
Jotsoma yimtsüng süngküm lapokba sentong nung Village Council, Vice Chairman, Kepelhukho Senotsu, Jotsoma yimtsüng Head GB nungeri puti otsü lemsatepba den yimtsüng süngküm yangluba tetezü aser süngküm yanglutsü koda tongtibang iba indang lemsatep. Thejavakhrie telok nungi züngsem, Kekoseto Nakhro, Kekhrieseto Peseyie, Rev. Savito Nagi aser Kekongulhu Sano nungeria par telok inyakyim indang lemsatepa liasü.