MLA Nuklutoshi-i tenüngsang agütsüba sentong agi

Chuchuyimlang yimtak Anü Mai Amphitheatre nung MLA Nuklutoshi-i election nung takok anguba asoshi tenungsang agutsüba sentong May 5, 2023 nü agidang tangokba aser Unger Women Wing-i ken atendang tangokba noksa nung angur.

Impur, Monupii/May 05 (TYO): Tanü Chuchuyimlang yimtak Anü Mai Amphitheatre nung MLA Nuklutoshi, 14th Nagaland Legislative Assembly election nung takok anguba asoshi tenüngsang agütsübap sentong ka agiogo.

MLA Nuklutoshi ya  22nd Arkakong Assembly Constituency nungi adok aser tanü iba sentong nung  pa phukumertem aser National People’s Party (NPP) nungi lenirtem aika adenshia kanga akhum keta agiogo.

Tanü iba sentong nung MLA Nuklutoshi-i jembidang election nung nüburtemi pei molungba candidate yariogo, aji süaka nübur tenzüktsü asoshi maoangka ngutet nung Arkakong nunger lenir ka ama Arkakong nunger shinga mebendangi liromedema yaritsü temelungtetba lir, anungji item mapatemji takok ngua inyaktsü asoshi Arkakong nüburtemi nungita yaridaktsüner, ta ashi.

Tanü putu nung lanur takotet zünger mapa mongui alir jenti lir, kidang mena mekazüi alima koleni aor ibaji repranga nüchi akumtsü lenmang bushia merangtsüla, aji asünung atsü-ayong mesüi pa dangi arua khuret lemsatepra akokba lenmang ajak nung yaritepa inyaktsü, anungji lanurtemi atapisa meli-i arutsüla, ta MLA Nuklutoshi-isa Arkakong lanurtem ajungmesoa ashi.

Kasa sentong nung Riongsanger Putu Chuchuyimlang, Chuchuyimlang Senso Mungdang tir S.T. Noktang Longkumer; T. Yashi Lkr, Yaongyimsen; O .Shilu Changtongya Town; Tiashilu Akhoya; Kilengmen Unit nungi Limasangwa Unger; Aodangit aser Akum Jamir, Advocate, panoki o tatsütsü jembiba den tarur pela agizükba o NPP Arkakong AC tir Moakumzük-i jembia liasü.

Sentong nung tepela o NPP Chuchuyimlang unit nungi jembiba den Unger Women Wing ajanga ken tajung ka tena lokti saksalemdaktsü aser sentong nung Tsüngrem leniba jazüka Yaongyimsen Baptist Arogo nungi pastor Chuba Aier-i sarasadema liasü.

Maneni sentong nung Tsüngrem tadenba asoshi Chuchuyimlang Baptist Arogo nungi pastor Rev.T.Lima-i sarasadem aser kongro Imnasenla ketdangsüba nung iba sentong agia liasü.