MLA-tem alenbangtsü meranger

Madhya Pradesh assembly nung MLA temi rongrongshirong dak sendakba ken o aser tanga ashishitep aketba onüktem mejembitsü atema sorkari ozüng yanglushiogo. Tensa azüoktsü aser tamajungba mekümdaktsütsü atema sorkari iba telemtetba ya agia ozüngji yanglushi ta ashir saka nisung aikati iba ya tim masüba inyakyim ka lir ta aitsür. Sorkari tang yanglushiba ozüngtem ajanga assembly nung Speaker nem tashi talila agütsür. Speaker ka indang teinyaktsüji tiyongtsü nung inyaksangshitsüba aser shinga tsütsü mashitsüba lir saka yimya agi iba menden nung amentsü atema ruling party nungi züngsem ka shimer. Madhya Pradesh sorkari yangluba ozüngtem rongnung opposition-i benokba no-confidence motion madak Cabinet-i benokba confidence motion tashi tuluba asütsü ta lateta lir. Madhya Pradesh nung chief minister Shivraj Singh Chouhan-i aniba Bharatiya Janata Party (BJP) sorkar lir aser parnoki ozüngtem yanglushibaji yimjak nung metetdaktsüogo, saka opposition aser media temi magizüker aser iba atema sorkari ano yanglushitsü tabo shiogo. India ya democracy nung ajemdaker inyaksangshia aoba linük ka lir aser Centre aser state sorkar nung yimsüsürtemji nübortem tenüng nung noktakertem lir. Anungji, yimsüsürtemi tasüngdangtsü mesüra ashishitep aketba onüktem atema jembitsüla aser jembitsüsa akümer. Iba ya Linük Temzüng ajanga melar aser sorkaria telangzüba agütsütsü aser onüktem agizüka inyaktsübaji temzüng nungsa lateta lir. Andhra Pradesh nung MLA tem ket nungi tashi agienba ajanga tajangzük kecha mangutsü mesüra tensa mazüoktettsü kechiyong tasüngdangbatem aser onüktemji alitsüsa. Yaküm küm Rajasthan nunga Bharatiya Janata Party (BJP)-i aniba sorkari Criminal Laws (Rajasthan Amendment) Ordinance 2017 yanglua liasü. Chief Minister Vasundhara Raje-i aniba sorkari tanga ajak toktsür journalist temi sorkar mapa inyakertem, obendangertem aser magistrate temi tim mesüi inyakba aser ochimashi mapa inyakba indang osang meproktsü atema ozüng ka yanglu. Sorkari item nisungtem ozüng kübok maitsü tashi osangbenertemi parnok indang osangtsüsang meproktsü atema tenokdangba agütsü saka tatem nung Rajasthan sorkari iba ozüng meyipa agitsüsa aküm. Media-i olulutem nung masü saka kulitem nung ajemdaker osangtem prokshitsüla aser ibaji nübortem atema kanga dang tongtipang lir. Talisa, tim mesüi inyakba aser ochimashi indang onüktem parnoki prokshitsüla saka item osang meproktsü atema noktangba ajanga sorkari menden tulu nung amenba nisung kar parnok sünütsü süa inyakdaktsünüba ang jungkai adoka sayua liasü. Sorkar yimsüsürtem, ketdangsertem aser ozüng amertemi tasüngdangba kechi asüngdangdir asüngdangaka agizüktsüla aser telangzüba agütsütsüla, kechiyong asen linük tamendakdak ‘democracy’ nung ibaji tongtipang shilem ka lir. Anungji, tangatetba shitak aliba nisung ajaki tawa Madhya Pradesh nung sorkari yangluba ozüng anema ola adoktsüla aser aitsütsüla. Tanü linük nung BJP-i parnok taginüba ama mesüra bilemba ama inyaksangshia onür asütsü akok saka tanüngba political party temia iba ama tashi alia anguba mapa ajizüka benshitsü akok aser yamaji anidaktepa inyakra, asen linük nung ‘democracy’ ta asüba olung ya malitsüsa tensa ka ajurutsü ana nung lir.