MLA tem aser APO lennirtem tsüngda Goodwill Meeting amen

Dimapur, February 17 (TYO) : Hokolbarnü State Banquet Hall, Kohima nung Sorkar aser NGO tem tsüngda Goodwill Meeting ka amen aser iba nung kin balala nungi MLA 14 den Angami Public Organisation President-i anir züngsem asem telok ka aden.
Dr. Vilhousa Seleyi-i ashiba agi, parnok APO tenüng nung masü saka parnoki kija tenüng nung tanü senden nung adentsü aru ta jangjajangja metetdaktsü, ta Media Cell, Chief Minister’s Office, Nagaland sangdong ka nung ashi.
Chief Minister TR Zeliang tang New Delhi nung oa lir aser pai par külem MLA tem kin balala nungi lennirtem den ajurutepa olemtep tejakleni bener aotsü atema tebilemba lemsatepa liasü.
ULBs indang elections agitsübaji Linük temzüng teinyaktsü ka liasü aser iba jagi Sorkari iba sülen anidaktsüsa aküm. Tesüiba küm 10 tema Nagaland nung council tem tenteta maliba ajanga, jilatem nung terenlok mapa inyaktsü atema sen crore aika magizüktet, ta tanü senden nung MLA temi ashi.
Roads & Bridges Minister, Vikheho Swu-i ashiba agi, tesüiba hopta ana tema sorkar office tem melapokba ajanga terenlok mapatem meinyakteter.
“Joko mei yakta atongtsü aser iba jagi terenlok mapa inyaktsü atema mapang tatsüka dang lir, anungji asenoki tekong merangtepba nung mapang meindokli, saka state ajungalen terenlok mapa inyaktsü atema mapang endokdi” ta Swu-i ashi.
Wokha district nungi MLA, Dr TM Lotha-ia ashiba agi, Bank tem shibangba ajanga state adena orr azüngba kaketshirtem timtem jenti ajurur.
Delhi nung oa azünger par jabaso kati pa dang sen nüngdaker ta phone ajanga ashi saka Bank melapokba ajanga pai sen meyoktet aser iba jagi Kolkata nung aliba kinunger ka ajanga yariteptsüsa aküm, ta Dr. TM Lotha-isa ashi.
Senden nungsa Cabinet Minister, Tokheho Yepthomi-i ashiba agi, hopta asem den tema mokdangba ajanga anogoshi aayangertem aser shishilembartem kanga timtemer aser ibaji talisa Dimapur nung lir.
Eastern Nagaland nungi MLA CL John-ia ashiba agi, state anüolen aser anüdoklentip tsütsü nungi Eastern Nagaland nung shisaliok aser Khristan yimsü bener aru aser State yimtiba nung tensa tajungba akümba ajanga tanüngba tesemtem nunga tajangzük angutsü.
Tanü senden nung MLA ajaki, sorkar mapa inyakertem pei tata mapa inyaka aotsü aser itasena agizüktettsü atema sorkar office tem lapoktsüla ta nenshia metetdaktsü.
Parnok ajaki APO ji state nung akhümket kin telok rongnung ka lir aser ano state yimtiba ali kiburtem asünung, sorkar office tem lapoktsü aser state yimtiba nung tensa tajungba kümdaktsütsü atema mapa inyakang ta mepishia ashi.
MLA temi jembiba kanga junga angaba sülen APO President Dr Seleyi-i ashiba agi, ULBs indang elections agitsü telemtetba agiba sülen nungi parnoki tesüiba ita ishika public-i aginüba ama mapa inyaka arur.
APO lennirtemi anogoshia ghonda 8 tema mapa inyaker aser iba denji külemi parnoki anogoshia nisung 60 den tema sensaksemer, ta paisa shisem.
“Sendaka alirtem den asüngdangya mesüi sorkari ULBs indang elections agira, ibaji tesasatsü mapa ka asütsü ta onok dang nisung meyirjang aikati ashi aser iba jagi onoki tetenzük nungi elections anema noktak” ta Dr Seleyi-isa metetdaktsü. Paisa, state yimtiba nung ozüng alema mapa inyakba indang osang metetdaktsü. Tanü senden nung MLA temi benokba onüktemji parnoki külem ketdangpurtem dang ashitsü aser olemteptsü, ta APO President-isa shisem.
Senden nung kin lennirtemi parnok telok tenüng nung mesüaka, parnok kija tenüng nung arua adenba atema MLA temi kanga pelaba metetdaktsü aser tarutsü nunga iba mesükba sensaksem mapangtem alitsü imlar ta shisem, ta Media Cell, Chief Minister’s Office, Nagaland sangdong nungsa metetdaktsü.