MLA temi SAGY kübok yim adopt asütsü

Kohima, September 19 (TYO): Nagaland State BJP MLA temi Ato kilonseri mangdang yur apitetba program Sansad Adarsh Gram Yojana (SAGY) Assembly Constituency level tashi nung inyaka constituency shia nungi yimtsüngtem ‘adopt’ asütsü telemtetba agiogo, ta Brihostibarnü Media Cell Dy. CMO sangdong ajanga metetdaktsü.
Iba Yojana ya rural development programme ka lir aser iba nükjidong ya yimtsüngtem terenlok atema lir, aser item terenlok rongnung loktiliba terenlok, sobaliba terenlok aser yimdaklirtemia longjemer shilem agia yimtsüng terenlok atema shisadanga inyakdaktsütsü atema lir.
“Iba programme ya 2014 küm October 11 nü Jayaprakash Narayan asoba anogomong nung linük Ato kilonser, Narendra Modi-i linük tesem ajaklen tenzükja liasü. SAGY kübok MP shiai Gram Panchayat ka ‘adopt’ asür aser lenla ajak nung terenlok atema inyaker,” ta sangdong nung shia lir.
SAGY tenzüktsüba sentong nung jembidang Ato kilonseri MLA tem danga State level nung yimtsüngtem ‘adopt’ asütsü ajungshia liasü.
Nagaland nung BJP MLA temi hopta piyong Ato kilonser arishi küm 69 küm ajungba “Seva Saptah” amongdang yimtsüngtem ‘adopt’ asütsü lemteta liasü.
Sept. 19 nü Deputy CM aser BLP Lenir, Y. Patton’er official kidang MLA tem senden amenba mapang nung iba telemtetba agi; iba senden nung State BJP Tir, Temjen Imna Along, Minister tem aser Advisor tem aden, ta kasa sangdong nung shia lir.