Dimapur, July 9 (TYO): Nagaland nung Parliamentary Secretary aser Advisor 8-i tanü Zeliang nunger lanurtem den sentong ka nung külemi shilem agi, aser iba mapang parnoki lanurtem dang Nagaland Chief Minister, TR Zeliang-i 2018 küm süira maneni inyaktsü atema yariteptsü ayongzük.
Jalukie Valley Youth Organisation-i Jalukie Students’ Union Central Park nung ayongzükba get-together cum picnic nung Naga nunger yimsüsür 8-i lanurtem aser Village Council Chairman tem dang TR Zeliang den mangatettep kar lira angatetteptsü aser parnok yimtsüngtem aser kin jenjang tajungba akümtsü atema Chief Minister den yariteptsü atema tayongzükba agütsü.
Parliamentary Secretary, S Chuba-i küm aika Jalukie nung BDO ama inyak aser tanü pai JVYO nung Advisor ka ama tesentaktep aliba menungra bilemteta jembi.
“Nagaland nung nenoksa tia takatiba kechiyong, nür district nungi MLA bo ana dang saka tena rongnung kabo Nagaland Chief Minister lir. TR Zeliang ji yimten nung mongin, ajemalu aser ajak den kasa litetba nisung ka lir,” ta S Chuba-i ashi.
“TR Zeliang-i Chief Minister inyakbaji Zeliangrong nunger ajaki nümatanga bilemtsüla. Nenoki pa den amalitepa yariteptsüla. Nagaland nung MLA 60 pronglai pa lenisüba nung vote agütsübji tesüngmangtsü ka lir. Democratic lima ka nung opposition maliba sorkar ka akümba otsüji khenyongi mangashidangba otsü ka lir. Iba jagi pai taküm Bali nung lifetime award for leadership angu. Pa lenisüba kübok India sorkar aser NSCN-IM tsüngda Framework Agreement agitep. Chief Minister den Tsüngrem dena lir aser pa ya shimtetba lennir ka lir, anungji pa anema noktakertem kodanga takok mangutsü. Peren district nung pa anema noktakertemji aibelena inyakertem lir. Chief Minister dak rangloker Naga nungertemi Zeliang nungertem akhümtsübu agütsür” ta paisa metetdaktsü.
Sentong nung Parliamentary Secretary, Kejong Chang-ia o jembidang, “Zeliang nungertem atema TR Zeliang dak alaka tanga CM candidate mali, anungji lanurtemi pa lenisüba kübok züngzünga anidaktsüla” ta ashi.
“Nisung ka taküm nung mapang tajungtibaji lanuwa lir aser nenok lanur lennirtemi tanü temoatsütem züngdangtsüla. Nenok Jalukie Valley nung aliba ya tangartemi kanga nükshia repranger” ta Parliamentary Secretary, YM Yollow-ia ashi.
“Ni Konyak nunger ka lir aser nia nenok ama backward nisung ka lir, saka nenok nisung ka Chief Minister jenjang tongogo. Anungji, nenoki chief minister aser pai aniba sorkar indang tamajung mejembitsüla, saka pa den yaritepa tajangzüktem agitsüla” ta Yollow-isa lanurtem aser village council chairman tem ayongzük.
“Zeliang nungertemi Chief Minister anema o jembiba angashidang kanga dang aoksar. Nenoki chief minister lutsüba nungi kechi tajangzzük angur? Assembly nung onok ajaki Chief Minister lenisüba sülen anidaker, süra kechiba Zeliang nungertemibo pa pusema menungiter?” ta Khumo-ia ashi.
Ano, Parliamentary Secretary, Er Levi-ia o jembidang, “TR Zeliang ji Peren nung alirtem shim saka pa Nagaland nung Chief Minister inyaktsübajibo MLA 60-i shim, anungji pa Naga nunger meyong lir” ta ashi.
“Anungji, tang nungi pa ya Zeliang nunger atema dang ta tebilem aser nenoki pa lutsüba manenra, nenoki Naga nunger ajak lutsür asütsü. Pa den mangatettep kar lira, nenoki Naga nunger tenüng nung pa den yimjung yangluang aser Nagaland state ajungkettsü atema pa nem mapa inyakdakjang” ta Er. Levi-isa ayongzük.
“2005 küm Rajya Sabha-i yokba sülen Naga nungertemi TR Zeliang dak sempet alibatem ajitet aser iba jagi Rio-i Chief minister menden toktsüba sülen MLA 60 pronglai pa shimtsü mulunga agizük” ta Advisor, Naiba Konyak-ia ashi.
“Onok ENPO nungi MLA 20 prong TR Zeliang lenisüba kübok longjema lir, anungji Peren district nung alirtema TR Zeliang lenisüba kübok longjemtsüla” ta paisa ashi.
Development Authority of Nagaland & NBRM Chairman, Dr Longriniken-ia o jembidang, “nenok district nungi Chief Minister ka alibaji maongka tulu ka lir, saka nenoki pa chief minister meinyakdaktsünüra, tangar kari pa menden melenzüktsü aser iba sülen jibo nenoki sasa bilemtsü saka mapang süir asütsü” ta ashi.
“Nür district atema dang masü saka state ajunga atema bilemang. TR Zeliang den mangatettep kar lira amadokang aser pai kodaser state tejakleni anir aotsü ta asüba ang shisa kaa bilemang” ta Dr Longriniken-isa ayongzük.
“Peren district ya temoatsü litsü ka lir aser iba district nung aliba lanurtemi ali rongsen kodaser ajangzüka agitsü ta asüba süoki ia bilemtsüla” ta Parliamentary Secretary, Amenba Yaden-ia ashi.
“Sorkar mapa joko mongui kümogo, anungji lanu putui ali nungi anguba rongsen atema shisadanga inyaktsüla aser iba nung sorkar teyari nüngdaktsü. Nagaland nung Chief Minister ji nenok district nungi lir, anungji iba maongkaji agia nenoki tajangzük angutsü aser terenlok atema mapa inyaktsüla” ta Amenba-isa lanurtem ayongzük.
You must be logged in to post a comment Login