MLA Vikho-o-i Kohima DPDB plantation drive tenzüktsü

Dimapur, June 4 (TYO) : Nagaland State Pollution Control Board-i tetuyuba agütsüba aser Kohima District Planning and Development Board (DPDB)-i lemtetba nung ajemdaker Kohima nung World Environment Day 2016 ayongzüka amung.
June 4, 2016 nü Kohima DPDB-i State Assembly aser Secretariat road, Kohima nung süngdong atem aser merükmeju mapa inyaka amung.
Iba sentong ya Youth Resources & Sports, MTF & State Lotteries Parliamentary Secretary aser Kohima DPDB Chairman, Khriehu Liezietsu aser Kohima Deputy Commissioner & DPDB Vice Chairman, Rovilatuo Mor, IAS na lenisüba kübok ayongzüka amung.
Sentong nung tongti tesemdanger ama MLA, Vikho-o Yhoshu-i State Assembly indang ‘Y’ junction nung süngdong ka tema plantation drive tenzüktsü.
“World Environment Day 2016 nüngtem nung ni DPDB Chairman aser Vice Chairman; Forest & Environment Minister, Dr. Nicky Kire, district nungi yimsüsürtem, DPDB züngsemtem aser shilem agirtem ajak tenüng nung süngdong ka temtsür” ta Vikho-o-i ashi.
Sentong nungsa YR&S Parliamentary Secretary & Chairman DPDB Kohima, Khriehu Liezietsu-ia süngdong ka atem.
Sentong nung Kohima DC, Rovilatuo Mor menden liasü aser pai Higher Education Department aser Phezoucha Krotho-i shilem agiba atema pelaba metetdaktsü.
ADC Kohima aser Tree Plantation Committee Convenor, Lithrongla Tongpi-ia anküp tepela o jembidang, MLA Vikho-o Yhoshu, Forest Minister, Dr. Nicky Kire aser district nungi MLA tem dang Kohima DPDB den yaritepba atema pelaba metetdaktsü.
Tanü sentong nung DPDB züngsemtemi Cryptomeria Japonica süngdong 150 atem aser merükmeju mapa inyak aser ano Phezoucha Krotho New Sectt. Area-ia Secretariat road nung merükmejua amung.