‘MLPC Act’ reprangshitsü asoshi Mizoram nung committee shim

Aizawl, March 24 (Agencies): “Mizoram Liquor Prohibition & Control (MLPC) Act, 2014 asoshi Review & Evaluation Committee ka state sorkari shimtetogo,” ta Mizoram Excise & Narcotics Minister, R Lalzirliana-i State Legislature tem dang Brehostibarnü metetdaktsü.
Mizoram People’s Conference (MPC) nungi MLA Lalthanliana-i asüngdangba langzüdang, “Mizoram Liquor Prohibition Control Act, 2014 nung ajemdaker state nung yi ayokba dokan lapokba ajanga tajangzük aser takoksa bener aruba bushitsü asoshi Review & Evaluation Committee nem tashi agütsüogo,” ta Lalzirliana-i ashi.
State nung Mizoram Liquor Total Prohibition Act, 1995, küm 18 tashi amshi aruba sülen MLPC Act-i melenzük.
“Yi ayokba dokan 39 lapoktsü asoshi aser bar ana lapoktsü asoshi licence agütsüogo, saka yi ayokba dokan karbo ano melapoki lir. MLPC Act 2014 kübok temelaba bena alir 71,230 liasü,” ta paisa ashi.
Arogo aser NGO telok balala nungi MLPC Act, 2014 anema nokdakaka iba maparen 2015 küm January 15 nung tenzük aser 2015 küm March 16 nungi tenzüka yi ayokba dokan lapok.