MLS asayamong EPL den tajungba akümtsü: Drogba

London, November 26 (Agencies): Britain nung ayongba nungtugu football asayamong, English Premier League (EPL) denbo America nung ayongba Major League Soccer (MLS) asayamong nung shilem agitsü tasakba ta taoba Ivory Coast national team captain, Didier Drogba-i metetdaktsüogo.
Paisa ashiba agi, tarutsü mapang nung MLS asayamong ya alima linük balala nung ayongba football asayamong rong nung tajungtiba akümtsü.
Taoba Ivory Coast striker, Drogba-i taküm May ita Chelsea telok toktsüba sülen Canada nung tentetba Montreal Impact telok tenüng nung MLS asayamong tembanga shilem agiogo.
“Nisung aikati Britain denbo America nung football asayatsü tayongba ta bilemer. Ajisüaka, asangsang nungbo yamaji masü kechiyong football asaya balala nung shilem agitsü asoshi yimti ka nungi yimti tanga ka bushia aodang asayartem kanga dang anibilemer,” ta Drogba-i metetdaktsü.
Drogba-i par Montreal telok tenüng nung goal 12 agütsüba den külemi, goal takok ngua agütsütsüsa külem asayar ken yariba osang jangjaogo.