MLTR-i December ita India sema kentena jajatsü

Mumbai, November 05 (Agencies): Denmark nungi pop aser soft rock ken atener Michael Learns to Rock (MLTR) nüngtugu telok-i Gurgaon nung December 11 nü nungi tenzüka India nung yimti tulutem sema kentena jajatsü. Iba telok ya 1988 küm tentet. MLTR telok nung kentener aser keyboard atemer Jascha Richter, drum atemer Kare Wanscher, guitar atemer Mikkel Lentz aser bass atemer Soren Madsen nunger lir.

Iba telok yagi ‘Paint My Love’, ‘You Took My Heart Away’, ‘Sleeping Child’ aser ‘Someday’ kentem tena lir aser parnoki Guwahati aser Kolkata yimtitem nunga concert agütsütsü sentong lir.

“Ozü telok tenteter küm 25 buba ‘Live’ sentong nüngtem nung tan December ita onoki India lima sema kentena jajatsü! India nung onoki arua ken atenba sentong rongnung tan ya sentong timba agitsü. India nung onok sapurtem angutsü onok tamang aser timla lir,” ta MLTR official website nung shila lir.

Parnoki tesüiba mapanga Shillong aser Mumbai na nung arua concert agütsüogo.

Tan parnok India tour ya 7 Sisters Entertainment-i acha ayangtsü.

“Tan parnoki mezüng Gurgaon nung aliba ‘Kingdom of Dreams’ tesem nung December 11 nü kenten sentong agitsü. Iba sülen December 13 nü Guwahati-i atutsü. Yang nung jagi December 15 nü Dimapur-i alutsü. Ano December 17 nü Kolkata-i aotsü aser iba sülen December 19 nü Goa-i alutsü,” ta 7 sisters entertainment co-owner, Kazingmei Shimrei-i IANS dang ashi.