MLTR-i Guwahati nung kenten sentong agi

Guwahati, December 14, 2015: Deobar aonung Michael Learns to Rock (MLTR) kentenba repranger külen Ananya Senapati aser medemertemi ashiba agi, lanuwa MLTR-i adenba ken jangratemasa angaa liasü, ajisüaka parnok sabang nung ken tetendak nung reprangba ya khenyongi balaka aser pongmang ka mesüka liasü.
Denmark nungi soft rock/pop kentener telok MLTR-i yimti nung music meimertem aser parnok sapurtem nem “Paint My Love”, “Sleeping Child”, “You Took My Heart Away”, aser “Someday” kentem den ano ken aika tentsü. Guwahati nung international pop kentener teloki kenten sentong ayongba rongnung MLTR ya mezüngbuba lir.
“Yimti temeim agi menokbangtsüti,” ta parnok Deobarnü Guwahati tongli, telok nung drum atemsang Kare Wanscher-i ashi.
Parnok Guwahati-i marudang aser küm ter tejakdang Shillong nunga kenten sentong agia liasü aser iba mapang yangji aliba nüburtemi parnok kanga pela agizük.
December 11 aonung linük yimtiba nung ken atenba sülen parnoki NE tesem nung merükmejuba tsütsü shilem agitsü jangrar ta metetdaktsü.
2001 küm Netherlands nungi kentener telok ‘Vengaboys’ yimti nung kenten sentong akatsü liasü saka state nung aliba kaketshir telungjemi anüolen sobaliba ajanga Assam lanur anisatsü tsübuba ajanga nokdanga ayu.
“Vengaboys nokdanger küm ter dak tema nung tang international pop kentener telok state nung arua kenten sentong agiba ya mapa tajung ka tenzüker asütsü. Ni iba sentong ayonger dang kanga pelar aser tang nungi tenzüka bendang linük nungi kentener telok aika maremdaki arutsü,” ta music nung mongin aser jilushi ayir, Satyakee DCom Bhuyan-i ashi.