MM Kalburgi tepsettsü atema mongintem hire asü: Karnataka CID

Bengaluru, March 24 (Agencies): Kannada kaketzülur aser rationalist, MM Kalburgi tepsetba ken o bushisüngdangba mapang ka nung Karnataka Crime Investigation Department (CID) special team-i, Kalburgi tepsettsü atema nisung tepseter mongintem hire asü, ta shiogo.

Nisung tepsetertemji Maharashtra mesüra Goa nungi asütsü südi ta melung melemi tang tebushitak lir.

Karnataka CID osang ajanga ashiba agi, Kalburgi tepsettsü atema inyaker tentet jagi nisung tepsetba tsüngsü meyutsünüba ajanga parnoki sen agüja nisung tepseter mongintem hire asü.

Karnataka CID osang ka ajanga, “Iba mapa inyaktsü atema nisung tepseter mongintem hire asü ta temaitsü nguogo. Kalburgi den rationalists- Govind Pansare aser Narendra Dabholkar nunger tepsetdang amshiba oset/hadir ji kasa. Saka nisung tepseter balalai parnok kahset,” ta ashi.

Tang police-i iba tentet aser Kalburgi tepsetertem bushidar. Nisung asem tepsetba tatalokbatemji kanga mesükteper. “Nisung tepsetba tsüngsü meyutsünüra nisung tepseter mongintem hire asür. Bike nung nisung ana arua tepsetba sülen tenaji Maharashtra mesüra Goa-i ao südi ta onoki melung malemer,” ta kasa osang ajanga ashi.

Yaküm August 30 nü northwest Karnataka, Dharwad nung mejangjaba nisungtemi Kalburgi par kidang kahset.

Iba anogo nung Dharwad nung nisung 20,000 dak tema aliba indang osang bushidang aser parnokji tang Karnataka nung mali ta bushitetogo, ta osang angazüker.

Ano külen Dabholkar aser Pansare na tepsetba ken o bushisangdangba telok, CBI-i Karnataka aser Maharashtra police na dang nungia teyari agitsüa akok.