MMC-i azü 2268 tenüng züluoka mozü agütsüogo

Mokokchung, September 08 (TYO): Nüburtem anema alitsü aser lendong timtem balala nungi kümzüka alitsü mechi Mokokchung Municipality kübok Ward balala ketdangser den longjemer Mokokchung Municipal Council (MMC) ajanga September 4, 2017 anogo nungi tenzüka Dog Registration & Proper Control of Dogs Rules & Regulation, 2017 sentong agiogo.
MMC den külemi Department of Animal Husbandry & Veterinary Service aser Local Ward Authorities ajanga September 4 aser 5, 2017 anogotem nung azü tenüng züluoka mozü agütsüba sentong takok ngua agi. Mokokchung Municipal Council kübok ward 18 nungi azü 2268 tenüng züluok, ta MMC ketdangser ajanga sangdong ka nung metetdaktsü.
MMC ajanga item mozütem ya jenjang tajemba nung sen 50 agi agütsü aser tenüng züluokba nung azü shia sen 200 agi. Item azü tenüng züluokdang meshiba sen nungi shilem 60 ya iba sentong dak sendakba mapa junga inyaktettsü asoshi Ward ketdangsertemi amshitsü aser tanüngba shilem 40 ya azü tenüng züluoka aliba ajunga nem parnok jangjatsü asoshi ‘uniform dog tag’ renemtsü aoshi MMC-i amshitsü, ta kasa sangdong ajangasa ashi.
Azü kiburtemi tashi angaa aser lenmang balala nung yariba ajanga iba sentong takok nguogo, ta MMC-i ashi aser Ward ketdangsertemi mita reprangba mapang temerenshi nungi jenbua alitsü asoshi Dog Registration & Proper Control of Dogs Rules & Regulation, 2017 nung shia aliba ama inyaktsü asoshi azü kibur dang maneni ajungshi.