MMC-i Swachh Bharat painting competition ayongzüka agi

Dimapur, November 14 (TYO) : Mokokchung Municipal Council-i Honibarnü Swachh Bharat Mission kübok inter-school painting competition ka ayongzüka agi.
Iba sentong ya MMC Shopping Complex nung ayongzüka agi aser school 9 nungi kaketshir 17-i ‘Kü Merali Mokokchung’, ‘Keep our Town Clean and Safe’ aser ‘Mokokchung: Past, Present and Future’ onüktem nung ajemdaker shilem agi.
Sentong atema tetushi süa jaokerji Swachh Bharat Mission Mokokchung chairman M. Bendangnukshi Longkumer liasü.
Tetsür aser tebur atema shilem asem lemsar agiba tetoktepba nung Model HSS nungi Taliyimba-i tebur shilem nung mezüngbuba jenjang takok angu, tanabuba jenjang nung Straightway School nungi Supongwati aser tasembuba nung GHS Mokokchung Village nungi Chungsen nati takok angu.
Tetsürtem shilem nung Queen Mary HSS nungi Imlisenla-i mezüngbuba, GHS Mokokchung Village nungi Surolila-i tanabuba aser Straightway School nungi Indra Rao-i tasembuba jenjang takoktem angu.
MB Longkumer-i o jembidang, MMC-i kaketshirtem asoshi tetoktepba sentong ayongzükba atema tenüngsang agütsü.
Kaketshirtemi merükmejutsü indang osang prokshitsü aser pei teka mapa ajanga sayuba mangdang aser alizüngtem asangsang nung ataloktsü atema merangtsüla, ta paisa ayongzük.
Naga nungertemi pei telidak kibo merükmejua ayur saka temeketbo merükmejua mayur anungji pei joka aser taktang merükmejua ayuba ama pei aliba temekettem merükmejua ayutsü atema kaketshirtemi osang proktsüla, ta paisa ashi.
Nagaland nung jila temerüktibaji Mokokchung jila lir saka asenoki iba dak sendakba nung temetongshitsü kar lir aser jila nung alirtemi merükmejuba yimya benshia jila merüka ayutsü merangtsüla, ta MB Longkumer-isa metetdaktsü.
Tanü agiba sentong nung ADC Mokokchung & MMC Administrator, Bendanglila-i anküp tepela o jembi aser MMC Superintendent, Pangjung Longkumer-i takokertem osang metetdaktsü.
Kaketshirtem tetoktepba nung tetendangertemji T. Wabang Kichu, Wabang Ozukum aser Imrongkkumba nungertem liasü.