MMC kübok jila merükteter nem OKM-i tenüngsang agütsü

Mokokchung, August 15 : Ongpangkong Kaketshir Mungdang (OKM) 2015-18 tenure ajanga Mokokchung nung MMC kübok jila telongtet yimtong merüka aoker aser jana bendena indokba mapa inyakertem nem tenüngsang agütsüba sentong ka August 15, 2015 anogo Ongpangkong salang, Mkg nung ayonga takok ngua agiogo.
Sentong nung OKM Tir R.Sunep Pongen-i jembidang Nagaland nungbo Mokokchung ya temerüktiba district rongnung ka lir aser iba ya MMC kübok aliba jila merüka okteta aser jana indokba mapa inyakertem shirnok tangar mejanga alidang memejangi meranga pei mapa ama angateta inyaker parnok ajanga lir ta ashi.Paisa iba ama mapa ya nisung aikati meinyaktettsü anungji shirnoki bendanga agüja inyakdar parnok nem tenüngsang agütsür aser maneni meranga inyaktsü ajungshir ta ashi. Koba tesem merüka lidir item nüburtemjibo mulungsentsüa temerük asür anungji jila nung aliba nüburtem ajaki merükmejuba nung temulung agüja aruba ama maneni shilem tajung agia inyaktsüla ta paisa ashi.
Sentong nungsa P. Thia MMC Inspector ajanga jembidang Jila nung lokti tenet shingaia iba ama anepdang-sangwa metitemi town merüka jajartem nem tenüngsang agütsüba ayonga makadangba sentong ka OKM-i mapa tajung shisateta agiba atema tenüngsang agütsür ta shia liasü.
MMC kübok jila merüka jajartem nisung 42 lir aser tang joko meiwa mongpu mapang asünung mapa inyakdang asemtsü atema OKM-isa mapa inyaker ajak nem raincoat ka-ka angati nisung shia nem lema agütsü.