Mmhonlumo anentsüba atema BJP mepelar

Dimapur, October 31 (TYO) : October 31, 2016 nü Party Head Office Dimapur nung State BJP pur senden ka amen aser tawa Mmhonlumo Kikon Parliamentary Secretary menden nungi anentsüba onük benoka olemtep, ta BJP Nagaland, Spokesman, Yanghose Sangtam-i sangdong ka nung metetdaktsü.
Mmhonlumo Kikon ya Labour, Employment & Skill Development Parliamentary Secretary inyaka liasü aser pa anentsüba atema mepelar aser magizüker, ta BJP Nagaland sangdong nungsa shia lir.
DAN nung teyariteper teloki iba telemtetba agiba atema jashir aser onoki DAN den tesentaktep meyipa reprangshitsü, ta parnokisa ashi.
Osangkakettem nung Johny Rengma-i sangdong kar agütsübaji party den sendaktepa mali aser party-i pa nem temelaba kecha magütsü. Anungji, pai jembiba onük asoshi party-i tebilemtsü khuret mabentsü. Pai kechi shiogo, ibaji pa kija indang tebilemba dang lir, ta BJP Nagaland sangdong nungsa metetdaktsü.