MNF-i kibongshinem sen lakh 3 agütsütsü nangzük

Aizawl, Rongchii 24 (Agencies): Mizo National Front (MNF) tir Zoramthanga-i ashiba agi, taruba Assembly election nung par party-i sorkar kümtetra parnoki kibong shia nem teyari sen lakh asemsem agütsütsü.
“Socio-Economic Development Policy (SEDP) kübok MNF sorkari kibong shia nem teyari sen lakh asemsem agütsütsü,” ta taoba telungpur lenir-i Tentonü Kolasib tesem nung sentong ka nung ojembidang ashi.
“Mizoram nung aliba nüburtemi Congress nem vote magütsütsü asoshi mulungteter lir aser parnoki terenlok aginüa MNF pusemtsü tenzükogo,” ta paisa ashi.
MNF lenir-i maneni Centre nungi aruba fund tem Congress sorkari tim mesüi amshiba atema parnok aitsü.
“State sorkari Centre nungi aruba fund tem bendenloktsü asoshi memerang saka mashiyimiang amshi aser iba ajanga nüburtem senotsü agi kangshir. State nung lenla kecha nunga terenlok mali,” ta pai sorkar aija ashi.
MNF sangdong ka ajanga ashiba agi, Kolasib constituency nung party balala nungi voter parnok 1,445 shi Zoramthanga-i par party nung Tentonü züngoksemtsüogo.