MNF-i Mizoram sorkar akümtsü; Tanüngba state 4 tia tanü metettsü

New Delhi, Luchii (December) 11 (Agencies): Iba osang zülu tashi nung Telangana, Rajasthan, Madhya Pradesh asder Chhattisgarh nung assembly election indang votes azüngba ano matem lir, saka Mizoram nungbo Mizo National Front (MNF)-i menden 26 ngua takok tulu nguogo.
Congress-i Chhattisgarh aser Rajasthan nung menden teimba nguteta lir aser Telangana nung KCR-i aniba TRS-i sorkar akümtsü ama takok ngudar. Ajisüaka, Madhya Pradesh nungbo Congress aser BJP na menden kasasa nguyonga aruba ajanga shiri sorkar akümtsü’ar meshitettsüsa tensa ka nung lir.
Tang state pungu nung Assembly elections ya 2019 küm general elections atema semi-final ka ama züngshir.
Chhattisgarh nung Indian National Congress (INC)-i tang constituency 67 nung leading lir aser külen Bharatiya Janata Party (BJP)-i menden 17 nung leading lir. Maneni, Mayawati–Ajit Jogi nati tentetba JCC+ alliance-i constituency 4 nung leading lir.
Chhattisgarh nung Chief Minister Raman Singh-i Governor nem pa mapa nungi anenba shidi agütsüogo.
Rajasthan nung chief minister Vasundhara Raje-i taonung Congress nem tenüngsang agütsü aser Governor Kalyan Singh nem lai menden toktsüba shidi agütsü.
Congress president Rahul Gandhi-i Bodbarnü Rajasthan nung taruba chief minister inyaktsü atema nübo shimtsü.
Züngsem 200 agi akümba Rajasthan assembly azüoktsü atema toktepbaji Raje-i aniba BJP aser Ashok Gehlot o Sachin Pilot nati aniba Congress tsüngda lir.
Telangana nung Telangana Rashtra Samithi (TRS)-i kümsük anabuba atongtepa sorkar akümtsü ama repranger.
K Chandrasekhar Rao-i aniba TRS yagi Congress aser TDS teloktep ‘Mahakutami’ den tokteper.