MNF-i nashishi nokdangba & Hindutva benokba magizüker

Aizawl, August 22 (Agencies): Mizoram nung nashishi nokdangtsü aser Hindutva benoktsü merangba anema nokdaktsü ta Mizo National Front (MNF)-i metetdaktsü.
Maneni Khristantem atema tongtipang anogo aser sodi anogotem meinprongtsü merangba magizüker aser anema nokdaktsü.
MNF tir Zoramthanga-i Yoga ashiba agi, sorkar office aser school tem nung yoga aser tanga tamangba inyakyimtem tashiyim agi benoktsü merangba nokdangtsü.
“MNF sorkar ketdangsütsüa tashi ngura, reju kecha nunga yoga tashiyim agi mebenshidaktsütsü” ta pai ashi.
Mizoram nung opposition tongti MNF-i BJP den lokteper tokteptsü akok ta olulu kar jembir saka Zoramthanga-i ashiba agi, sangküm assembly elections nung parnok kija sür tokteptsü.
Mizo Hnam Run office nung party züngsemtem den senden ka amendang, Zoramthanga-i, “nisung kari MNF-i election matongdang BJP den tesentaktep yanglutsü ta jembir, saka ibaji shitak masü. Asenok kija sür dang tokteptsü” ta metetdaktsü.
North East Democratic Alliance (NEDA) atema paisa, nisung kari NEDA nung MNF adenba atema mashileni angateter, ta shisem.
“North east nung Congress masüba teloktepi tentetba NEDA nung MNF ya shilem ka dang lir aser NEDA-i Centre nung NDA yarir. NEDA nung züngsem ka asüba ajanga onok iba telok nung densemogo ta ashitsü makok” ta Zoramthanga-isa metetdaktsü.