MNF purtemi Mizoram minister amokmeren

Aizawl, February 06 (Agencies): Mizoram nung opposition telok Mizo National Front (MNF)-i tanü state Labour, Employment and Industrial Training (LE and IT) Minister, Lalrinmawia Ralte aser Mizoram Youth Commission (MYC) Mendenbuba T. Sangkunga, MLA asüng nungi office-i marudaktsütsü amokmerenogo.
Kolkata nung amenoker aliba Bachelor of Hotel Management institute taila ka nung, Mizo nunger kaketshir par 32 state sorkari tazüngi yokba ken o nung, opposition party-i Ralte aser Sangkunga na nem tai tongloktsü.
Parnoki kaketshirtem tarutsü jenjang raksatsüba aser Mizoram Building and Other Cosntruction Workers Welfare Board (MBOCWWB)-i sen lakh 128 agütsüba tim mesüi amshiba atema, MYC mendenbuba aser minister na aitsü.
Mizoram People’s Conference (MPC), Zoram Nationalist Party (ZNP) aser BJP nung lanurtemi state yimtiba, Aizawl nung Minister aser MYC mendenbuba na mapa nungi anendaktsütsü asoshi khanga posters mesangtsü lemtet.
Sorkari tawa taoba mapang LE and IT nung Director Rotluanga, aser taoba MYC Superintendent mapa nungi anentsüogo, saka opposition teloktemi maneni Congress MLA ana ya mapa nungi anendaktsütsü asoshi akhanger.
Hokolbarnü Congress pur senden nung Chief Minister Lal Thanhawla-i, pa chief minister menden nung ali tashibo Ralte aser Sangkunga na mapa nungi manendaktsütsü, ta shiogo.