MNF sorkari Mizoram nung district tasen 3 kümtettsü

Aizawl, March 1 (Agencies): 2008 küm MNF sorkari nangzükba ama sorkari Mizoram nung district tasen asem kümtettsü ta Health minister aser Mizo National Front (MNF) vice-president R. Lalthangliana-i ashi.
Ketdangsübaren nung teyari angutsü atema 2008 küm MNF sorkari Saitual, Hnathial aser Khawzawl district tasen asem kümtettsü ashi, ta tanü pai sentong ka nung jembidang metetdaktsü.
Tang Saitual ya Aizawl district kübok, Hnathial ya Lunglei district aser Khawzawl ya Champhai district kübok lir.
Congress-i jila asem ya district headquarters mekümdaktsütet, ta Lalthangliana-i tai tongloktsü.
Yaküm Assembly elections mapang nangzükba ama MNF sorkari district tasen asem kümtettsü anungji nübortemi ataa alitsü ayongzüker, ta paisa shisem.
Saitual, Hnathial aser Khawzawl nung alirtemi tesüiba küm 40 tashi district headquarters balaka kümtettsü takhangba agüja arur.
2008 küm MNF-i district tasen asemji kümtettsü ta sangoktsü saka Assembly elections nung Congress tsüngdang parnoki tamakok anguba ajanga mapa meinyaktet.
Congress-i district tasen asem kümtettsü nungnang kechiyong iba ya mezüng regional party MNF-i sangdonga liasü, ta MNF-i tai tongloktsür.