Moatsü ajanga arrtsü nung nübortem tesentaktep akangshir

Tsuremmen Yim Moatsümong nung tongti tesemdanger Wb. Temsu Jamir (abelen) aser Mogroigaon yimtsürtemi Bihu tsüngsangdang Tsuremmen watsülartemi külemi tsüngsangba angur. 

Dimapur, May 2 (TYO): Küm shia May 1 nü Mokokchung district kübok Assam den arrtsüa aliba Tsuremen yim nung Moatsü benjung amunger aser iba benjungmung nung arrtsü adena orr alirtem den tesentaktep aser telongjem tali akangshir.
Taküma kasa anogo nung Tsuremmen Yim Moatsümong sentong ayonga amung aser iba nung tongti tesemdangerji Joint Director of Food & Civil Supply Department, Nagaland, Temsu Jamir liasü.
Küm shia yimya ka ama Jorhat, Assam nung Titabor subdivision kübok aliba Mogroigaon yimertemi Tsuremmen Yim Moatsümong nung shilem agir aser parnok GB (goanbura)-i anir benjung nung yartsüngsang ajanga shilem agir aser iba sülen saisapong den chiyungba nung adener.
Yashi ayonga amungba benjung nunga Mogroigaon lanurtemi Bihu dance ai aser GB Taisenmong Raj Kumar-i o tatsüka jembi.
Taisenmong-i o jembidang, telok ana tsüngda yimjung aser putepa alitsü atema mapa inyaktsübaji pa indang teinyaktsü lir, ta ashi.
“Tesüiba mapang tangar kari telok ana tsüngda mepetmesü adokdaktsütsü atema meinprongogo. Nisung shinga nema Naga aser Assam nunger tsüngda telongjem raksatsü atema mapa meinyakdaktsütsü” ta paisa shisem.
Taküm benjungmung nung Assam nungi local Television channel tem arua shilem agi aser parnoki Moatsü benjung indang sentong live sayu.
Sentong nungsa Titabor SDPO, Gayatri Sonowal aser Mariani OC naprong aden.
Temsu Jamir-i tongti tesemdanger o jembidang, yimdaklirtemi clean election 2018 atema mapa inyaktsü atema ayongzük.
“Tangbo, asenoki candidate tem ket nungi sen meshia magili saka nübortem asoshi mapa inyaktsüba candidate tajung ka shimdi” ta pai ashi.
Tsuremen Moatsü sentong nung mendenji Watitemjen, Teacher GMS Tsuremmen liasü, Wb L Imnuk Longchar-i Moatsü ratet jembi, Wb S Meren Ao, Deputy Manager (Project) NHHDC Ltd Dimapur aser Wb N Nungsang Longkumer retd Teacher nati tepela o jembi aser Wt M Asola, Associate Pastor Women-i tenüngsang agüja sarasadem.
Yashi Mogroigaon yimertemi Moatsü benjung nung shilem agi aser sangküm January ita Tsuremen yimertemia Mogroigaon-i oa idakji Magh Bihu benjung nung shilem agitsü.