Moatsü amonger

Taküma memetetika moatsü mapang aruogo. Ibai asenok asoshi mapa nungi anogo ishika anisüngzük agir pelatepa benjong amongtsüba mapang lir. Atangji, nisung taküm ya mapa mapa inyakba agidangbo taküm ali meshizüker, saka mapa meranga inyaka belemba yari pelatepa benjonga amongtsüla. Aji oda, benjong amongtsü asoshi mapa meranga inyaktsüla aser meranga inyakba nungi anguba temoatsütemji yimtsür yimer, kinunger aser medemertem den lemsatepa benjong amongtsüla. Nisung shia asoshi taküm nung ibaji jangratemtsüka lir. Akhi tsürabur mapang nungi benjong amongtsü asoshi mapa talila inyaka rongsen bendenba sobaliba liasü. Aji oda, benjong nung achitsü asoshi kidang ak ajep aser ano züngar tenteta sen aadena ayu. Iba amaji küm piyong benjong nung achitsü ak ajepba aser sen bendena ayuba agi nashi alia moatsü nep nashi aser akji tsüngseta kinunger adianu aser züngartem lemsaa achibaji jangratemtsüka liasü. Ibaji shi lemsaa achiba kisüng masü saka temeim aser tepela lemsatepba mapa ka liasü. Atangji, tanüa yimtsüng aika nung kasa sobalibaji benshia alitsü. Ajisüaka, ano yimtsüng aika nung iba ama benjong amongba sobaliba samadaktsüogo. Iba jagi moatsü anogo agi moatsü memesük süidaktsür aser mapa mapa dang ashi, kenüa kinunger adianu, kiyonger, medemer aser yimtsüryimertem den pelatepa chiyongtepa temeim lemsateptsü mapang mengutetter. Atangji, ano tanü putu nung benjong memongtetbaji makamaitba agia memongtetter, kechiyong nisung aikati alua mayimer aser tanga mapa nunga temulung magütsür ta anogo shia kazülen mapang endoker. Iba jagi benjong amongtsübaji yutsür chiyongtsüa mangu timatemba kibong aika lir. Ano, telok karibo benjong amongtsü asoshi tangar dang tenlaa meshia amonger. Iba amaji telok karibo benjong amongba sentsüh menokdaktsütsü asoshi benjong sentong nung tongti tesemdanger jaoker. Item tangatetbaji kenyongi tai aser asen akhi tsüraburtemi benjong amongtsü tenzükba tetezü aser nükjidong menentsür. Akhi tsüraburtem mapang nungi monga aruba benjongmong Moatsü aser Tsüngremmong ya limapur asüba mapang tenzükba among asünungji, tanü asenok Khristan purtemi item amongtsümong amongba ya tai amato bilemer. Ajisüaka, tai süra benjongbaji masü saka amongba yimyabaji asütsü. Aji oda, Christmas benjonga Tsüngrem tenüng sanga sarasadema amongtsü melen yijemtepa mongra Christmas amongba yimyaji tai asütsü. Iba tangatetba nung asenoki Moatsümong ya amongtsüla. Moatsü ama benjong amongba yabo chiyongtepa amongba mapang dang masü saka sobalibaren angazükba mapang lir. Iba mapang ya pei akaba ajak sübor kimaktepa senzüba aser shijep agütsütepba sobaliba yimya ya Aor sobaliba tajungtem rongnung ka asütsü. Atangji, moatsümongsa asüyonga tanübo akhi limapur mapang amongba amato masü saka Khristan purtem ama kimaktepba mapang nunga kensü kasa nung tanü asen putu dak apetba ken tasen mejema tenteptsüla. Tanü asenoki sobaliba ken tasen mejema atentsü kangabo mebilemer, iba jagi ken a akhi ken, otsüla obolua nungertemi atenba kentem dang atener. Ashiko, iba jagi tanü amangba purtem rongnung moatsü ama tsürabur benjong amongtsübaji temulung ajunga agibo magizüker südi. Aji oda, tanü putu nung akhi otsüla oboula nunger mapang nungi tenzüka aruba sobaliba aser amongtsümong meindoki tajungba aser tapetba küma yanglushir amongtsübaji kanga nüngdak kümogo. Atangji, mapa keccha meinyak küm piyong benjong dang monga mejajatsü saka asenok ama Ao kin mesüra Naga kin rongnung benjong amongba sobaliba melira nübortema mapa meranga meinyaktsü aser benjong amongba malinungji asen limaji mangyimer lima-ang ka mesüka tepreper tepreper asütsü. Aji oda, tanü putu tasenba nung asen tamangba yimsü, mapa inyakba yimya aser libaliro den putepa sobaliba benjongmong ya amongtsü asoshi ajungshitepra, iba jagi nübortem mapa, ano talila, meranga inyaktsü. Iba tangatetba tasenba nung asenoki akhidang dang nungibo tanüang merataketba Moatsü aser Tsüngremmong mongtettsü.