Moatsü amongtsüla

Tang amai moatsü mapang arudang asenok rongnung moatsü amongtsü-mamongtsüba indang kanga jembir . Ibajia tejembila jembir kechiyong moatsü ya akhidang asenok Khristan makümba mapang amongba limapur benjong lir aser ano külen ibai asenok aluyimba dak aketba sobaliba benjong ka lir. Aji oda, tangbo asenok limapurtema masü aser ano külen alu ayimertema aikabo mali ta asüba mapang moatsü amongtsüba ya asenok tanü sobaliba dak mapet amai akümer. Ajisüaka, asenoki jungjunga bilemdangra, alima nung pei kin benjong mamongba kinbo mali, kechiyong benjong ya pelatepa yartsüngsanga chiyongtepba dang masü saka benjong ajanga nisungtem anasai bener arua longjemdaktsür aser putepa lidaktsür. Iba jagi benjong amonger. Atangji, benjong amongbaji nisungtem pelatepba dang masü saka nisungtemi pei teyanglur aser temoatsür Tsüngrem bilemteta amonger. Iba jagi Tsüngrem peladaktsür. Aji oda, asenoka Naga nunger aser Aor ta asüba kin ayak mesamai alima nung tangar kintem den akümketa alitsüsa asen tsürabur sobaliba mesamadaktsüi tajungba tajungba yanglushia benshitsübaji kanga tongtibang asütsü. Iba tangatetba nung akhidang limapur asüba mapang moatsü amongba yimya nung masü saka tanü Khristan kümer Yisu Khrista dak amangba purtem yimya nung moatsü amongtsübaji kanga tenüngdaktsü kümogo. Khristan-bo aküm saka akhi limapur yimya nung mongra mamongang tajungba, kechiyong iba ama mezüpelangba jagi asenok Khristan-a masü aser limapur-a masü ta kümdaktsür. Aji oda, akhidang nungi asenok amongtsümong ajak ya alu aser tamangba yimsü dak sendaktepa alinungji, tanü kasa amongtsümongji asenok tamangba yimsü aser asenoki inyakba mapa dak sendaktepa sentong yanglur amongtsübaji kanga tongtibang kümogo. Asenok Khristan saka Naga nunger Khristan asünungji Khristmas benjong kija agibo meperir, kechiyong iba benjongji asenok alu aser mapa den kecha sendaktepa mali. Aji oda, asenok Moatsü aser Tsüngremmong benjong ana ya yimten aser lokti tentettemi dang masü saka arogoi dena tenla kidang sentong tajung yanglua agira, iba jagi asen sobaliba ajanga Tsüngrem tali sentsüwangshidaktsütsü. Iba ama Moatsü sentep sentong nung kentenertemi tetsü tebou kensü nung Yisui asenok moatsüba indang atentsü aser Tsüngremi moatsüba indang onük nung o jembiri jembitsü aser mapa inyakertem ajak atema temoatsü meshia sarasademtsütsü. Atangji, tanüa tenla kidangsa mesüaka asenoki moatsümong sentong sarasademer tenzüker aser sarasademer atemer. Iba jagia temelenshi tajung ka sayur saka ano iba dang nungi mera tali ka meraloka oa arogoia Khristmas sentong ama ayongzüka moatsü among nungbo ajak asoshi ajiang temoatsüba süla ta bilemer. Ano, moatsü amongba sobaliba nung tajung kaji züngar tenteta külemi nashi mesüra ak tepseta külemi pelatepa chiyongtepa amongba ya asütsü. Aji oda, moatsü dang külemi chiyongtsü atema züngar tenteta jelia senotsü aadena yur amongba jagi medemer kibongtem rongnung tali teputep adokdatsür aser benjong tetezü metetter. Alemlibo, moatsü züngartemji alui ayangi ao saka tanübo office nung aser business inyaker teimba asünungji, yimya tapu balala nung senotsü melamelaa bushitettsü. Iba ama pelatepa amongtsü asoshi sorkari office nung inyakertem nema sodi agütsür. Atangji, asenok ajak asoshi tongtibang kaji, benjong mongnüyonga senotsü mekara memongtettsü aser ano benjong amongyonga tangar dang meshimetsüa amongtsübajia nüngdak madoker, anungji benjong amongtsü asoshi meranga inyaktsüla. Tanü asenok dak aketba jakla tamajung kaji pei ket nungbo kecha maka saka tangar dak imlar benjong amongtsü sentong yanglur. Iba tebilemba nung tongti tesemdanger jaoker. Ajisüaka, tanga lima nungbo tongti tesemdanger jaokba ya senotsü tenla imlaa masü saka pa nem akhüm agütsütsü aser shisatsü meshitsü asoshi jaoker. Ibayongji, Dimapur nungbo tongti tesemdanger jaokba sobaliba ya anendaktsüogo. Ashiko, iba jagi Dimapur nung takümbo kecha telokia moatsü amongtsü mayongzük südi. Ajisüaka, asenoki tongti tesemdangerji Tsüngrem südaktsür, tanü putu asen mapa, sobaliba  aser tamangba yimsü dak apet moatsü mongra, iba benjongjisa tuluba, telongsoba aser tajungba asütsü.