Moatsü salem

Aortemi Tsüngrem temoatsü reprangteta tenüngsang agüja temoatsü meshisemba aser kinunger-medemertem den pelatepa amongba Moatsü benjong tepela salem tazünger ajak nem metetdaktsür. Atangji, benjong mapang süaka tesem aika nung benjong sentong yanglua mamonger aser kibongtem nunga aikati kecha balaka Moatsüa ta metettsüsa memongi alitsü. Ajisüaka, ibai Moatsü benjongmong mapanga ta ajaki meteta lir, anungji temulungjang nungbo benjong molung agi pelatepa Moatsü salembo agütsüteper. Alima nung benjong amongba ya nisungtem pelateptsüba dang masü saka Tsüngrem külemba sentong ka lir, anungji Tsüngremi mulungba ama Moatsümong sentong yanglua amongtsübaji tanü putu nunga jangratemtsüka asütsü. Alima nung anisüngzüka mali aser benjonga mali ta mapa mapa dang inyaka alitsübo tezüdangtsüka lir aser ajibo alima nung ali meshizük asütsü. Atangji, tanü asüngbo asenok rongnung nisung teimbaka mapa maka anogoshia kazüa alitsüa akok. Ano, tanü asüngbo nisung teimbakati shi ango madenbo chi mechiyongtetter. Iba jagi balaka benjong amongtsübaji kecha balaka masü amai aküm südi. Ajisüaka, alima nung ali tashi koba kin aser shiba südir süaka, benjong memongiang nübortem longjema melitettsü aser yimtsür yimer aser kinungertem rongnunga putepa melitettsü. Benjong amongba yagi Tsüngrem temeim aser temoatsü bilemteta nübortem ajurutepdaktsür aser tesensaktep akangshir. Asenoka yim kar nungbo Moatsü mapang nungang tasürtem bilemteta tangar yimtsüngtem nungi dena akang tembartem arua kinunger aser adianutem den temeim lemsateper. Ano, Moatsü sentong tajung yanglua yangji külemi pelateptsü asoshi tangar kin nung dena jaoka amonger. Iba jagi ano tesendaktep tali akangshir. Talisa, tang ama Chuchuyimlang nung Moatsü sentong tulu ayongzüka yur yangji shilem agitsü asoshi tangar kin ana asem tashi nungi jaoka amongba jagi par den dang masü saka Aor ajak den parnokji tesensaktep tajung yangluadoker. Atangji, alemli tetsü tebou mapang süng long külemba putu nung Moatsü benjong mongtepbaji jangratemtsüka süaka taküm Tsüngremibo sempatsüsa mashimashi mezüpelanga monga alitsüa akok, saka tanübo alima shisatsü aser tanüla tsütsüa temetetba aser tangatetba putu nung taküm Tsüngremi mulungba ama sentong tulu tajung yanglua Moatsü amongtsübaji ano tali jangratemtsü taketba asütsü. Alima nung lokti aser yimten tenteta lir ser nung benjong mamongbajiang azüngazünger aser nisung aika külemi alir süaka kija dang alir amai azüngmeyaktsü. Iba tangatetba nung Moatsü tajungtiba nung amongtsü merangteptsüba dak alaka Moatsü mamongtsüla tabo tebilema mebilemtsüka aser tejembia  mejembitsüla. Tanübo Moatsü benjongmong ser nung kecha benjonga memesük asenok aika pei akhi alu mapa nung monga alitsü mesüra akhi ama nisung teimbaka mapa maka odang kazütepa alitsü. Ano, aika Moatsü mongnüaka memongtetter, kechiyong asenoki sentong jelia yanglur, iba atemaji inyaka matar. Ano, asenok nisung aikati Moatsü amongtsübaji tangar kari tenla agütsü nung dang amongtsü amai bilemer. Iba jagi memongtetter. Ashiko, taküma nisung karbo Moatsü mongner ser nung  makamaitba agi mesüra aküm tulu agüja jaoktsüsa tongti nisung manguba agi mamonger asütsüa akok. Asenok lia lia, alima aso 21 buba tashi nguteta alirtemi nisung ka tongti tesemdanger südaktsütsü aser pa mesüra la dang tenla meshia benjong amongtsü tashiang shisatetba, angatetba aser tongtetbaji kanga tejashitsüka lir. Iba jagi asenok ano alar shisatsü aser alar kolok nungi nüchi maküma ta sayur. Benjong amongtsüba yabo peisasa mongtettsüla aser benjong nungbo Tsüngrem külemtsüba dak alaka nisung külemabo mamongtsüla. Arogoia Moatsü sentep sentong yanglua aka nung junger, takartemia ajak külemi chiyongtsüsa sentong yanglu nunga junger, saka lokti tentet aser kija kibong shinga benjong amongtsü asoshibo tangar dak nendaka malitsüla.