Mobile app ajanga Voter ID card atema inyaktettsü

Chennai, October 10 (Agencies): Sangküm Tamil Nadu nung state assembly election agitsü lia tanü Chennai nung Electoral Assistance System tapping mobile aser online facility tenzüktsüogo, aser iba ya linük nung tang mezüng asütsü.
Iba facility tasenba- EASY ajanga vote agütsütsüpur kati mobile phone, telephone mesüra online portal service ajanga pa mesüra la indang voter ID card nung temelenshi benoktettsü, ta State Chief Electoral Officer, Sandeep Saxena Saxena-i ashi.
“Item ama facility ya tang mezüng linük nung onoki benokogo, koba ajanga vote agütsütsüpur ka indang osang shitak agütsütettsü aser anogo 15 tsüngda voter temi pei indang voter identity card angutsü,” ta tanü pai Chennai nung osangbenertem dang ashi.
Paisa, tamalen Tamil Nadu nung district balala apir voter tem indang osang agüja aliba inyakyim melenshia tangbo district 32 prongla nung jenjang tajungba küma inyakyim tasenba ya benshitsü, ta ashi.
“Iba inyakyim ajanga voter data nung nung aibelenba onoki intoktettsü. Ibaji kanga junga inyaktettsü,” ta pai ashi.
Pai ashiba agi, election commission website nung temelenshi kar adokdar aser website tasenbaji October 16, 2015 nü tenzüktsü.

You must be logged in to post a comment Login