Mobile phone ajanga shisaluyimba nung tetsüdaktsü bener arutsür

Saharanpur, October 11 (Agencies) : India aser bendang linüktem nung shisaluyimba rejutemi classroom nung mobile phone mamshitsü atema tenokdangba agüja lir kechiyong iba ajanga shisaluyimba nung tetsükdaktsü bener arutsür ta Darul Uloom Deoband-i ashi.
Darul Uloom nung dang masü saka shisaluyimba reju ajak nung multimedia phones mamshitsü noktanger, ta Islamic seminary nung officiating VC, Maulana Abdul Khaliq Madrasi-i ashi.
Tekülem ki, gurdwara, tenla ki aser mosque semdangertem danga parnok mobile phone switch-off asütsü tetuyuba agütsür. Ibaji asünungdang parnok sarasademdang meinprong kecha malitsü, ta Madrasi-isa ashi.
Delhi University, JNU aser UK o US nung university aika nung kaketshirtemi classroom nung multimedia phones mamshitsü tenokdangba lir, ta paisa shisem.
Pei ki toktsür tanga nung oa azünger kaketshirtemi pei kibong den tongteprateptsü atema feature phones amshitsü akok. Kaketshirtem tazüngtsü atema shisaliok rejutemi arur aser parnok ket nung multimedia phones aliba putetra, ozüng tapet agi merenshitsü, ta Madrasi-isa metetdaktsü.