Mobile Seva den RD website & Local Govt. Directory website lapokogo

Kohima, July 06, 2015: Hombar nü Kohima, Secretariat Conference Hall nung Chief Secretary, Pankaj Kumar IAS-i RD website lapoktsüba noksa nung angur. 

Kohima, July 06 (TYO): Digital India Week dak sentakba nung July 06, 2015 nü Kohima, Secretariat Conference Hall nung Rural Development Department den Department of Information Technology & Communication-i Mobile Seva, RD website aser Local Government Directory website lapoktsüogo.
Iba sentong nung jembidang tongti tesemdanger, Chief Secretary Pankaj Kumar IAS-i, Digital Revolution ya linük tesem ajak nung ilongdagi aser senso ajungai technology nguteter ta ashi.
Kumar-isa, technology ajanga lenmang tajungtiba nung osangtsüsang nguteter aser iba ya ajanga alima nung yimtsüng aser yimtsüng tesem ajak sentakteptsü bilemer, ta ashi.
Iba temelenshi tulu ajanga nübur libaliro tajungba aser temelaba kümdaktsür, ta paisa ashi.
Ano RD Secretary, Kelie Zeliang-ia, technology nung state-i tangar meneptsü meranger aser anogo ka kija nung IT & C kübok Mobile Seva aser RD kübok websites ana lapoktsüba ya department anati inyaktetba tulu ka lir, ta ashi.
Paisa, 2011 küm lapokba Mobile Seva ajanga sen aika meintoki mobile application balala ajanga service tapu aika angütsü, ta ashi.
Paisa ashiba agi, RD website lapokba ajanga tang nungibo website amshirtemi iba site lapoktettsü aser department indang feature balala, mapatongtem, inyaktetbatem aser osangtem angutsü.
Local Government Directory website lapokba ajanga website amshirtemi yimtsüng indang osang aser yimtsüng aliba tesemtem angutsü, District aser Block koba kübok koba yimtsüng lir’ar metettsü, iba den külemi yimtsüng level ajak indang osang iba website nung angutsü, ta paisa ashi.