Model Village nung ghonda 48 144 CRPC alitsü

Dimapur, Sept. 09 (TYO): Dimapur district kübok Model Village aser telungtet nung Model Village aser Wb. Sopu Angami den par telok na tsüngda ali tsütsü mangatettep adoka tensa mejungi akümba jangjaogo, ta P Sendongmeren, NPS, District Magistrate aser Commissioner of police (officiating) Dimapur, Nagaland-i sangdong ka ajanga metetdaktsü.
Iba ama tensa ka nung nisung pongu mesüra iba dak tema adenshira nüburtemi timtem ajurutsü aser kiojen raksatsü südi ta arendaka, mangatettep aliba tesem Model Village, Dimapur nung tensa meraksatsü asoshi mera agia rongdak teinyaktsü benoktsüsa akumer, ta sangdong nungsa shia lir.
Anungji Model Village nung September 9, 2016 nikongdang 3:00 ako nungi tenzüka taruba ghonda 48 tashi 144 CRPC (Code of Criminal Procedure, 1973) (2 of 1974) ozüng nung aliba ama nisung pungo mesüra iba dak tema adenshitsü memelar, ta kasa sangdong ajangasa metetdaktsüogo.