Moderna aser Kenya na tenangzüktepba ka yanglu

Nairobi, Metsüremi/March 8 (Agencies): Pharmaceutical company tetsüti Moderna-i, Africa nung parnok indang mezüngbuba mRNA vaccine manufacturing facility ka amenoktsü asoshi Kenya sorkar den tenangzüktepba ka nung sign süogo.

Hombarnü company sangdong ka ajanga ashiba agi, parnok nükjidongji continent atema küm nung vaccine dose million 500 adokdaktsütsü atema lir. Iba facility ya drug substance manufacturing dak rangloker inyaktsü, ajisüaka fill-and-finish work dena bendenloktsü atema atsülangshitsü akok.

“Takhangba dak ajemdaker Moderna-i 2023 küm tashi nungbo Africa nung COVID-19 vaccine yanglutsü atema sentong yangludar,” ta company-i ashi.

Tang alima nung Africa continent nung coronavirus vaccine tajemtiba agir lir aser nüburtem nem vaccine agütsütsü atema shilem 99 bo tanga linük nungi belener aruba dak metaloker lir, ta World Health Organization-i ashi.

Takar linüktemi tarutsü atema vaccine telung junga bendena ayuba atema Africa nunger lenirtem tezü danga, continent-i vaccine yanglurtem tali anir arutsü atema bangjemogo.

October ita Senegal aser Rwanda-i, Africa nung mRNA vaccines yanglutsü atema mezüngbuba start-to-finish factories yanglutsü asoshi BioNTech den tenangzüktepba yangluogo.