Modi aser BJP-i Ishrat case nung jangjunger:Congress

New Delhi, April 19 (Agencies) : Mongulbarnü Congress-i, Ishrat Jaha injang agi kahsetba ken o nung aitsür alir case, tang Ahmedabad court nung zükdaka aliba, court inyakyim nung linük Ato Kilonser aser BJP lenir Amit Shah nati kanga jangjunger, ta ashi.

“Tiyazü injang agi kahtepdang asü ta jembiba ken o nung Ato Kilonser Narendra Modi aser BJP Tir Amit Shah nati kanga makmanüi linük nüburtem nem tangatetba tai agüja iba ken o jembitsü nokdanger,” ta congress otongdar Randeep Surjewala-i New Delhi nung sangdong ka ajanga metetdaktsü.

“Iba ken o dak sentakba nung par minister temi osang aser olulu prokshiba den tai aketer ozüng agi malendaktsüi nokdangtsü atema Modi sorkar-i inyakyim tesashi ka tenzükogo,” ta pai ashi.

Surjewala-i, Modi aser Shah nati India nunger nisung crore 125 dang tenati kechiba iba ken o, Ishrat Jahan case makadaktsütsü nokdanger iba osang tejangja temai adoka metetdaktsütsüla, ta metetdaktsüogo.

“Tena ya (Modi aser Shah) kechi miimbangner mesüra kechi tsübur ? Tena tebilemba linük rangben nem metetdaktsütsüla. Modi sorkari iba ken o tiyazü küli agi nembangtsü meranger,” ta pai ashi.

Gujarat High Court monitored investigation den angatettepa CBI-i iba case atema benokba züluzüpong ajak Ato Kilonseri metetsümonga miima ayuba atema congress-i pa aitsüogo.

“Tiyazü injang agi kahtepdang asü ta jembiba tatalokba nung Indian Penal Code kübok nisung tepsetba nung aitsütsü langa sür nung Modi sorkari ibaji meteta paitoker,” ta Surjewala-isa ashi.

Tenati iba tatalokba nung ochi miimbangnüba agi iba ken o makadaktsütsü meranger, ta paisa aija shiogo.