Modi aser Kejriwal na yimtenren nung tsükchir makumtsüla: Naidu

New Delhi, November 22, 2015: Deobar nü New Delhi nung ‘Swachch Delhi Abhiyan’ lapoktsüdang Union Urban Development Minister, M Venkaiah Naidu-i Delhi Chief Minister Arvind Kejriwal aser Deputy Chief Minister Manish Sisodia nem sen crore 96 indang cheque agütsüba noksa nung angur. Noksa nungsa BJP MP, Meenakshi Lekhi-a angur. 

New Delhi, November 22 (Agencies): Deobar nü Urban Development Union Minister, Venkaiah Naidu-i, Ato kilonser Narendra Modi aser Delhi Chief Minister Arvind Kejriwal na yimtenren nung tsükchir makumtsüla, ta ashi.
Linük yimtiba Delhi yimti temerükba akumtsü atema tanü ‘Swachh Delhi Abhiyan’ campaign tenzüktsüba sentong nung jembidang BJP lenir aser Union Minister Naidu-i, “Nüburtemi Modi aser Kejriwal na shimbaji asenoki akhümtsübutsü nüngdak aser tena yimtenren nung tsükchir makumtsüla, saka terenlok nung dang rangloktsüla,” ta ashi.
Tanü iba sentong nung Kejriwal aser Naidu napronglai ‘Swachh Delhi Abhiyan’ ajanga tajungzük angutsü atema Centre sorkar aser Delhi sorkar na tangatettep nung yaritepa inyaktsüla, ta ashi.
Iba sentong nung Naidu-i Delhi sorkar nem sen crore 96 indang cheque agütsü. Iba sen ya Delhi yimti merüktettsü atema amshitsü.
Delhi chief minister Kejriwal-i, yimti merüktettsü mapatong nung yimtenren nükjidong tashi mait liasü, ta metetdaktsü.
“Yamuna (ayong) merüktettsü atema onoki autonomous institution ka tentettsü, iba tentet ajanga nüngdakba tashi ajak amshitsü. Delhi nung jana-rüja anema meranga inyaktsü,” ta chief minister-i ashi.
Iba sentong nungsa BJP MP, Meenakshi Lekhi aser North, East aser South Delhi Municipal Corporation tem nungi Mayor tem denogo.
Hombar nü Kejriwal-i ‘Swachh Delhi’ app tenzükja liasü, koba ajanga yimti nung alirtemi ketdangsertem dang jana rüja noksa sayutsü. Kasa anogo nungsa November 22 nungi November 30 nü tashi ‘Swachh Delhi Abhiyan’ akatsü sangdonga liasü.