Modi aser Oli na ajurutep; India aser Nepal train agi sendakteptsü

Kathmandu, Luroi (August) 31 (Agencies): Hokolbarnü India aser Nepal tsüngda railway line ka yanglutsü atema MoU agitepogo.
Prime Minister Narendra Modi-i Nepalese Prime Minister K P Sharma Oli den ajurutepa senden ka amenba sülen Bihar kübok Raxual nungi Kathmandu tashi train lenmang yanglutsü tenangzüktep agi.
Taküm Modi aser Oli na asemben tashi ajuruteper asütsü. April ita Oli-i India semdangdang Modi den ajurutep aser May ita Prime Minister Modi-i Nepal semdangdang tena ajurutepa liasü.
“India-Nepal tesentaktep dak sendakba onük aika künati jembiogo” ta 4 buba BIMSTEC Summit mapang tena ajurutepba sülen Modi-i osangbener dang ashi.
Lennir anati linük ana tesentaktep atema jembi. Tena tsüngda senden tajung menogo, ta Ministry of External Affairs otongdar Raveesh Kumar-i Twitter nung metetdaktsü.
Raxaul (India) aser Kathmandu (Nepal) tashi train lenmang yanglutsüba indang MoU nung Nepal nungi Ministry of Physical Planning and Works, Madhusudan Adhikari aser India nungi Manjiv Singh Puri nati sign asü, ta Kumar-isa ashi.
Nepal sorkar den asüngdantepa India nungi Konkan Railway Corporation Ltd-i train lenmang tasen atema engineering-cum-traffic survey agitsü.
China-i Tibet ajanga Nepal den railway sendakteptsü mulungtepba sülen küm ana lir külen India aser Nepal tsüngda MoU agir asütsü.
Tanü Prime Minister Modi-i Thailand aser Bangladesh nungi prime minister tem den-a ajurutepa sendentem amen. Paisa Sri Lanka aser Myanmar tirtem den ajurutep.
Bay of Bengal Initiative for Multi-Sectoral Technical and Economic Cooperation (BIMSTEC) ya India, Bangladesh, Myanmar, Sri Lanka, Thailand, Bhutan aser Nepal linüktem adenba regional telok ka lir.
Iba telok nung alima nütsüng yongsük shilem 22 dena lir aser USD 2.8 trillion indang combined gross domestic product lir.