Modi aser Putin nati India-Russia tesentaktep akhangshitsü bangjem

Tashkent, June 24 (Agencies): Hokolbarnü India aser Russia na civil nuclear energy aser hydrocarbon sector nung yaritepa inyaktsü atema o lemtep aser Ato kilonser, Narendra Modi o Russia Tir, Vladimir Putin nati linük ana tesentaktep tajungba akümtsü atema bangjemogo.
Uzbekistan yimtiba, Tashkent nung Shanghai Cooperation Organisation senden alidang jurila senden ka nung Modi aser Putin nati linük ana tesentaktep akangshitsü aser kasa tebilemtsü onüktem nung o lemtepa liasü.
External Affairs Ministry otongdar, Vikas Swarup-i, “Lenir anati civil nuclear energy nung yaritepa inyaktsü, gas aser petrochemicals sector nung partnership atema jembi. Tenatisa space sector nunga taliba amalitepa inyaktsü atema jembi. Shishilembaba aser investment onüka jembia liasü,” ta metetdaktsü.
India-i SCO indang Memorandum of Obligations sign asüba atema Putin-i pelaa agizük. SCO nung züngsem akümtsü atema India-i ano document 30 nung sign asütsüsa akümtsü.
Putin-i ashiba agi, BRICS nung India Mendenbuba atema Russia-i pusemer.
“Tir, Putin-i India ya partner tajung ka lir ta ashi. Russia aser India na tsüngda mapang talangka nungi tesentaktep lir. India-i SCO indang Memorandum of Obligations nung sign asüba atema pelaa agizük aser BRICS nung India mendenbuba atema pusemer ta ashi,” ta Swarup-isa metetdaktsü.
Paisa ashiba agi, India SCO züngsem akümtsü atema Russia-i pusemba asoshi Ato kilonser Modi-i Russia dang pelaba lemsatep.
Taküm küm tatemlen India nung BRICS (Brazil-Russia-China-South Africa) senden ayonga akatsü. Yaküm July 8-9 anogotem nung Russia yimti, Ufa nung 7buba BRICS senden ayonga aka.