Modi aser Raje nati nangzükba ama meinyak: P Chidambaram

Jaipur, Luchii/December 01 (Agencies): Taoba mapang Union Finance Minister, P Chidambaram-i, Centre nung BJP sorkar aser Rajasthan sorkar nati nangzükba ama meinyak, anungji temelenshi atema mapang tongogo, ta metetdaktsü.
Congress lenir Chidambaram-i, küm pongu tejaklen taoba assembly election nung state nüburtemi vote agutsüdang Narendra Modi indang yimyim aser pai nangzükbatem ajanga parnok puadaktsür liasü, ta ashi.
Vasundhara Raje (Chief Minister)-i takok angubaji Modi ajanga liasü, ta shia Chidambaram-i, “Narendra Modi mesüra (Chief Minister) Vasundhara Raje napronglai nüburtem dang nangzükba ama meinyak,” ta ashi.
Tanü Jaipur nung osangbenertem senden ka nung jembidang pai, sorkari nangzükba ama rongsenkettsüng main, mapa madokdaktsütet, capital investment aser exports jenjang majungkettsütet, ta ashi.
“Mapa manguba tebilemtsü tuluba akumba ajanga ajaklen timtem lir, bank NPA (non-performing asset) timba akumer, aluyimertem sentsüh ajanga timtem tuluba akumer,” ta pai ashi.
Demonetisation aser GST junga mebenokba ajanga mapa million aika samatsüogo, tilateri shishilembar aser micro, small & medium enterprises (MSMEs) sentsüh timba kümdaktsüogo, ta pai ashi.
Paisa, tamalen Rajasthan nung Congress sorkar aliba mapang nung gross state domestic product (GSDP) ji shilem 6.5 liasü, ajisüaka tangbo (BJP sorkar mapang) shilem 5.7 dang kümogo, ta metetdaktsü.