Modi-Cameron na defence & Make in India indang jembi

Washington, April 02 (Agencies): Washington nung Nuclear Security Summit (NSS) senden alidang Ato kilonser, Narendra Modi-i British Ato kilonser, David Cameron ajurua jurila senden ka amendang linük ana tsüngda defence nung yaritepa inyaktsü atema jembiba den  ‘Make in India’ onüktem jembi.
Tanü Washington, US nungi Saudi Arabia-i apusotsü lia Modi-i twitter ajanga, “Ni Ato kilonser, David Cameron ajura senden amendang defence nung amalitepa inyaktsü aser Make in India den tongtibang onüktem nung jembi,” ta ashi.
Kasa senden nung yaküm Modi-i Britian semdangba mapang lemtetba onüktem-a jembi.
Osangbenertem den jembidang Ministry of External Affairs otongdar, Vikas Swarup-i, 2015 küm Modi-i London semdangba mapang India aser Britain na tsüngda sen pound billion 9 indang tezüngzüktep agiba aser civil nuclear pact tezüngzüktep agiba indang lenir ana tsüngda lepshia jembi, ta metetdaktsü.
Swarup-i ashiba agi, Modi-i Cameron dang, India nung mapa ashirtem lir, taa ishiba agia aayangertem nübo angutsü, anungji ‘Make in India’ mapatong nung Britian ji tongtipang teyariteper ka akümtsü akok ta shiogo.
Lenir ana tsüngda kiralongraba onük densema anendaka aliba onüktema jembiogo. “Ato kilonseri (Modi) IT Company tem atema Tier II visas onük jembiogo. Mapa ashirtem UK nung arua mapa inyaktsüji tasak masütsü ta pai shiogo,” ta Swarup-i ashi.