Modi dang nungi Manmohan tajungba liasü: Amarjit Singh

Hyderabad, December 03 (Agencies): Taoba mapang Research and Analysis Wing (R&AW) nung tongti, Amarjit Singh Dulat-i, Ato kilonser Narendra Modi-i politics angazüktsüla, ta ashi.

Times of India osang den jembidang taoba mapang Intelligence Bureau nung special director Singh-i, Jammu & Kashmir ken o kanga junga angateterji Jawaharlal Nehru sülenbo Atal Bihari Vajpayee liasü, ta ashi.

Singh-isa, Modi-i Pakistan den ken o jembiba mapatong meinyakba ya tim masü, ta ashi.

Pai züluba kaket ‘Kashmir, The Vajpayee Years’ atema Manthani ayongba sentong nung jembidang Dulat-i, “Vajpayee (taoba mapang BJP Ato kilonser) ya lenir ka aser yimtenren lenir ka liasü aser Modi-i politics angazüktsüla, aser tena tsüngda ongdangji ibaji lir. Kü tangatetba nungbo, Modi-i politics angazüktsüla, aser India nunger yimtenren nung kanga nüngtugu Vajpayee dang nungi pai mangazükbaji tesasatsüka lir,” ta ashi.

1965 batch IPS officer Singh-isa, Manmohan Singh ya Modi den tajungba liasü, kechiyong Kashmir onük atema taoba Ato kilonser (Manmohan)-i kanga meranga inyak, ta ashi.

Taoba mapang Kashmir onük atema Prime Minister’s Office nung Dulat ya advisor inyaka liasü, aser yangji pa January 2001 nungi May 2004 tashi inyak.

Paisa, Islamabad nung taruba SAARC senden nung Ato kilonser Modi-i shilem agitsüla, ta ashi.

National Security Advisory Board züngsem Dulat-i, Kashmir Valley nung ISIS kiralongrartemi sashia kongshiba mali, ta ashi.

“Kashmir nungeri parnok sentoker ama bilemer aser jashir. Lungkak aitba mapang Pakistan aser ISIS wako ayipshiba nungji tai mangatettsüla,” ta pai ashi.

“Kashmir nungeri teimla makai tesünep aginüa bushir,” ta paisa shisem.