Modi danga SRK followers timba kümogo

November 06, 2015: Twitter nung Bollywood actor Shah Rukh Khan sülen anidaker (followers) Ato Kilonser Modi dang timba kümogo. Shah Rukh Khan sülen anidaker nisung million 16 jungogo aser ibaji ajanga twitter nung India nunger rongnung followers timba alir Amitabh Bachchan (17.6 million) sülen pa tanabuba kümogo aser Modi (15.8 million) tasembubai luogo.
Bollywood nung ‘badshah’ ta ajasangi January 3, 2010, nü Twitter nung @iamsrk tenüng amshia aden aser mezüngnü nungi twitter amshir rongnung kanga bulua amshirji pa-a ka lir. Pai kibong noksa, film nung ajangshibatem, sangro, kentet (quotes) aser tapu aika twitter ajanga teti lemsateper. Pai linük balala nung pa sapurtem nem twitter ajanga taküm atema tetuyuba tajung agütsür aser ‘question-and-answer sessions’ tem akar.
Shah Rukh-i November 2 nü pa küm 50 ajungba nüngtem nung ‘Periscope’ nung aden.
Iba anogo tulu nung Twitter ajanga nisung 350,000-i pa den tasoba anogo tepela salem lemsatepa liasü. Ajak rongnung ‘#HappyBirthdayKingKhan’ ta ashir timba liasü.
Iba den külemi Karan Johar, Hrithik Roshan, Farah Khan, Kajol aser Preity Zinta nungeria twitter ajangasa pa den tasoba anogo salem lemsaba den ano teti anema aser pela alitsü lemsatepa liasü.
Pa küm 20 shi TV aser film nung shilem agia aruba mapang pa dak sempet aika aliba ajanga nüburtemi pa kanga sapua aküm.
Tawa pai linük nung tangar temeten, tebilemba aser tamangba anemertem (extreme intolerance) kanga bulua kümogo ta ashiba ajanga BJP MP kati pa Pakistan kiralongrar, Hafiz Saeed den atishia jembi aser BJP nung lennir tejen katia linük raksatsür (deshdrohi), ‘traitor’ ta jaloktsüogo. Iba den külemi Sadhvi Prachi-i pa ‘Pakistani agent’ ka ama atishia jembi.
“Happy New Year” film nung tongti shilem agisang ya ano memunui Rohit Shetty-i yangluba “Dilwale” film nung küm pongu sülen Kajol tenati tongti shilem agiba angutsü.