Modi dangi shidi 30 ben zülü, saka telangzüba magütsü: Anna Hazare

New Delhi, Aenjeti (January) 22 (Agencies): India linük nung ochimashi anema nokdaker lenir, Anna Hazare-i Ato kilonser, Narendra Modi aija, Ato kilonser menden nung amenba ajanga pa dak asüküm lir, ta aitsü.
Amongnü Maharashtra kübok Sangli nung lokti senden ka nung jembidang Hazare-i, “Ni tesüiba küm 30 tsüngda Ato kilonser Modi dangi shidi 30 ben dak tali züluogo, ajisüaka pai kodanga telangzüba magütsü. Ni züluba shiditem atema pai telangzüba magütsü, anungji Ato kilonser menden abenba atema pa dak asüküm lir,” ta ashi.
Taruba ita, Metsüremi 23 nü Hazare-i aluyimertem onük nung longkak aittsü lia tang pai Ato kilonser aija jembiogo.
Aluyimertem atema longkak aittsü aliba dak sendakba nung nübo ayimtsü atema pai lokti senden balala ayonga kadar.
“Iba longkak aitba sentongji tanga mapang dang nungi khenyongi balaka asütsü, aser ibaji sorkar dang tekümdangtsü ka metetdaktsür asütsü,” ta paisa metetdaktsü.
“Lokti senden aser longkak aitba sentongtem ajanga ni vote ayimtsü tebilemba mali. Jan Lokpal atema lokti senden tuluka aliba mesüka aluyimertem onük nung ayongba lokti sendenjia tuluka asütsü,” ta pai ashi. Hazare-i ashiba agi, pai sorkar dang nungi akhangba onüktemji- Lokpal mapa küma inyaktsü, Lokayukta ka shimtsü, aluyimertem nem pension sen 5,000 agütsütsü aser alu nungi züngsentembatem nung jenjang tutsütsü densema lir.
Aenjeti (January) 16 nüa longkak aitba sentong nung Hazare-i AAP tongti lenir aser Delhi Chief Minister, Arvind Kejriwal aija liasü. Hazare-i, iba movement nungi joko yimtenren lenir kata madokdaktsütsü atema inyaktsü, ta metetdaktsü.