Modi-i Aadhaar inyakyim gondha ana asadanga among

May 09, 2016 nü New Delhi nung Ato Kilonser Narendra Modi Aadhar aser Direct Benefit Transfer (DBT) mapatem asadangba senden nung adenba noksa nung angur.

New Delhi, May 10 (Agencies) : Linük Ato Kilonser Narendra Modi-i nisung billion ka dak tema aliba biometric database, Aadhaar welfare reform scheme, aser subsidy angutsüpur nem parnok account nung sen indang indanga inoktsüba maparen koma inyakdar ibaji gondha ana asadanga mongogo.
Küm tenet tejakdang Congress-i yimsüsüba mapang tenzükba Aadhaar database scheme asadangba sülen Ato Kilonser Modi-i, iba inyakyim nung temelenshi adokba ajiteter, ta ashiba senden nung adener tain kati metetdaktsü.
Iba scheme nung India nunger shia tamajung inyakyim nungi jenbua alitsü aser tangutsü tim agütsüdang nisung aibelen mesüi agütsütsü atema kija shia temeyong temaitsü aser iris signatures tangoka ayur. Aadhaar number ji ka tanga kasa mali.
Yaküm küm Direct Benefit Transfer (DBT) inyakyim kübok tagütsütsü tim nisung crore 30 nem sen crore  61,000 lemtsüogo, ta Modi nem metetdaktsü.
Iba sen lemzüktsüba nung MNREGA scheme aser LPG (gas cylinder) subsidy dena lir.
Iba senden nung IT, Rural Development aser Petroleum Ministries nungia dena liasü.
Tangbo sen tangutsüpur nem indang indanga parnok account nung inoktsüba ajanga tom nung sen mesamar, ta senden nung adener kati NDTV dang ashi.
“Ration card taila crore 1.6 nokdangogo. Ibaji anendaktsüba kija agia yaküm sorkari sen crore 10,000 kümzüktetogo. Ano MNREGA inyakyim nunga sen crore 3,000 kümzüktetogo,” ta kasa nisungi pa tenüng meshi-i NDTV osangbenertem dang ashi.
Temelenshi ajanga tangotsü langa alirtem kecha nunga metsükdakdaktsütsüsa inyakang, ta Modi-i shiogo.
Linük nung aliba NGO telok balala atema Aadhaar mesükba ID ka ka lapoktsütsü atema ano tang inyakyim tasen ka tenzükdar. Tang tashi nung NGO 71,000-i tenüng agüja lir.