Modi-i aniba sorkar agientsü anogo züngdangteta lir: Mayawati

Lucknow, Monupii/May 26 (Agencies): Tanü Bahujan Samaj Party tongti lenir, Mayawati-i BJP-i aniba NDA sorkar aija, Modi agientsü mapang tenzükogo, ta ashi.
Mayawati-i, “Iba sorkar yimsüsüba kübok ochimashi, osettsüset nung jenjang atuba, mapa manguba aser rara taliba kümogo. Joko parnok agientsü atema anogo züngdangteta lir,” ta ashi.
Congress aser Samajwadi Party natia kasa olen nung BJP-i aniba Centre sorkar aija liasü. Congress nung inyakertemi Narendra Modi-i aniba sorkar küm pezüji ‘Vishwasghat Divas’ ta amongtsü telemtetba agi aser Samajwadi Party tongti lenir, Akhilesh Yadav-ia sangro mesükba olen ka nung BJP sorkar aitsü.
Mayawati-isa, Centre sorkari Kathua aser Unnao na nung tashiyim amshia tetsür raksatsür tepsetba ken otem miimbanga ayutsü merang, ta aitsü.
“Modi sorkari par sorkar küm pezü ajungba atema benjungteptsü temeden mali, kechiyong parnoki lenla ajak nung tamakok nguogo,” ta lai ashi.
Petrol aser diesel totzü jenjang kanga atuba dak sendakba nung BJP sorkar aija Mayawati-i, “Ato kilonser Modi-i putiotsü asütsüsa inyaker ama jembir, ibayongji pai aniba sorkar mapang nung putiotsü asütsüsa totzü jenjang sashia tuogo,” ta aitsü.