Modi-i aniba sorkari Lokpal Act tashi meiti kümdaktsüogo: Anna Hazare

Khajuraho (Madhya Pradesh), December 04 (Agencies): Social activist Anna Hazare-i, Centre nung Narendra Modi-i aniba sorkari anti-corruption Lokpal Act tashi meiti kümdaktsüogo, ta aitsü.
Paisa, “Taoba Ato kilonser, Manmohan Singh-i o kangbo mejembir, ajisüaka pai-a Lokpal ozüng tashi meitdaktsü,” ta aitsü.
Yasüng Khajuraho (Madhya Pradesh) nung osangbenertem den jembidang Hazare-i, “2016 küm July 27 nü Parliament nung amendment ka benokba ajanga Modi-i iba ozüng tashi meitdaktsü. Iba amendment ajanga sorkar ketdangsertem kinüngtsü, jabaso, jala aser kinüngertemi kümshia parnok indang rongsen aser kiojen osang sangdongtsü makok,” ta ashi.
Ochimashi anema inyaker Hazare-i anogo asemnü `Jal Sammelan’ sentong nung shilem agitsü atema Khajuraho-i arua liasü.
“Shidakba bill nungji sorkar ketdangsrtem indang kinüngertemi parnok indang kiojen osang tejangja sangdongtsüla,” ta paisa ashi.
“Amendment bill ji kenüyongi dang Lok Sabha nung benoka o metoktepi agizük. Iba bill ji Rajya Sabha nung July 28 nü benok aser July 29 nü Tir dangi yok. Iba ozüng ya anogo asemnü kija nung tashi meiti akum,” ta pai ashi.
Tawa Hazare-i pai sangküm March 23 nü linük yimtiba nung Lokpal aser aluyimertem tebilemtsü onüktem nung longkak aittsü, ta sangdonga lir, aser pai ashiba agi pai Ato kilonser, Modi dangi onük aika nung shidi züluogo, ajisüaka kodanga telangzüba mangu.
Aluyimertem timtem dak sendakba nung Hazare-i, 1950 Act nung tsünüsempenttsü atema loan agiba nung compound interest magitsüla, saka bank temi iba sen tetemlokji agi, aser ibaji anema sorkaria kecha meinyaker, ta aitsü.
Hazare-isa, arishi küm 60 dak temapur aluyimertem nem ita shia pension sen 5,000 agüjang, ta takhangba agüja lir.