Modi-i Assam nung gas cracker project lapoktsütsü

Guwahati, February 03 (Agencies): Hokolbarnü Ato kilonser Narendra Modi-i Assam nung sen crore 10,000 indang gas cracker project lapoktsütsü.
Osang ka ajanga ashiba agi, “Hokolbarnü Ato Kilonser Narendra Modi-i Assam Gas Cracker project lapoktsütsü sentong lir. Fertiliser Minister Ananth Kumar aser Petroleum Minister Dharmendra Pradhan nati pa meina arutsü.”
Tang mezüng Northeast India nung petrochemical project lapoker, aser iba ya NE tesem ajungalen socio-economic terenlok atema 1985 küm August 35 nü Assam Accord nung densema lir.
2007 küm taoba Ato kilonser Manmohan Singh-i Dibrugarh anasa Lepetkata nung iba project atema lung azünga yutsü.
Iba project inyaktsü atema Brahmaputra Crackers & Polymers Ltd ta ser company ya tenteta liasü. Iba project ya sen crore 10,000 intoka yanglu, aser iba nung ya Centre sorkari subsidy loan crore 5,000 agüja lir.
Iba project ajanga küm shia high quality polymers lakh ton 2.80 adokdaktsütsü, iba den külemi küm shia polyethylene lakh ton 2.20 aser Polypropylene 60,000 adokdaktsütsü.
Item polymers ji plastic furniture, PVC pipes aser tanga packing atema amshitettsü.