Modi-i Aurangzeb ama angbangyima tashi amshir ka: APCC Tir

Dibrugarh, February 19 (Agencies): Assam nung Congress aser BJP tsüngda o toktepba manener aser tanü Congress MLA aser Assam Pradesh Congress Committee (APPC) tir Anjan Dutta-i Prime Minister Narendra Modi aser Mughal chuba Aurangzeb na medemdanga jembiogo.
Putu 17 buba nung Mughal nunger taochi maliba chuba Aurangzeb-i Hindu nunger tekülem ki noklang aika raksatsü aser tashiyim agi Hindu nungertem Islam yimsüi melendaktsü ta puti otsü bushirtemi ashir. Aurangzeb-i küm 49 (1658-1707) tashi yimsü asü.
“Modi ya Aurangzeb lir. Prime Minister-i Hindutva tenüng nung yimten mapa inyaker. Aurangzeb-i kechi inyak? Pai Hindu nungertem tashiyim agi yimsü melendaktsü. Aurangzeb ama Modi-i angbangyima tashi amshir” ta Sivasagar nung osangbener senden ka nung Dutta-i ashi.
Assam nung nübortem yimjung nung alir saka BJP-i nübortem tsüngda telemsa adokdaktsütsü meranger. BJP Assam loktiliba nung telemsa adokdaktsünür saka Congress-i ibaji matalokdaktsütsü, ta paisa ashi.
Tanü Dutta-isa Union minister aser BJP atema chief ministerial candidate Sarbananda Sonowal aija jembi.
Assam movement ajanga Bodo nunger telungpur khuret aser minority students’ union adokdaktsü, kechiyong iba mapang züngsem agi tangar memenepertem reshikangshi.
Assam movement ji Sonowal amala lennirtemi ketdangsüa inyak. Ibala nisung jagi sorkar yimsü asütsü atema tashi ngura Assam nung tensa koma akümtsü?” ta Dutta-i Sonowal aija jembi.
Assam Pradesh Congress Committee (APPC) tirisa tawa Rahul Gandhi-i Assam semdangba ajanga takok tulu nguogo ta ashi.
“Rahul-i March 27 matongdang ano Assam semdangtsü. Tawa Rahul’er rally nung nisung aika adenba ngua BJP arentaka bilemer aser parnoki onok party vice-president tenüng menüktsütsü merang. Ajisüaka, taruba election nung Assam nung alirtemi telemsa adokdaktsütsü asoshi inyakba teloktem nem telangzüba tajung agütsütsü” ta Dutta-isa ashi.

You must be logged in to post a comment Login