Modi-i ayongba senden nung Congress CM tem madentsü

New Delhi, July 12 (Agencies): July 15 nü Ato kilonser Narendra Modi-i ayonga aliba senden nung Congress chief minister tem madentsüa akok. Taruba hopta Parliament senden amentsü lia ayongzükba senden nungji Modi-i Land Bill onük süoka jembitsüa akok, ta osang ka ajanga ashi.
Party osangtem ajanga angazükba agi, aluyimertem anemba bill aser corporate tem ajangzükdaktsütsü bill ta Congress-i züngshiba bill atema ayongzükba senden nung party chief minister tem madentsüsa temaitsü nguogo.
Iba ya National Institution for Transforming India (NITI Aayog) governing council senden tanabuba asütsü.
Tang Kerala, Karnataka, Himachal Pradesh, Uttarkhand, Assam, Manipur, Meghalaya, Arunachal Pradesh aser Mizoram state tem nung Congress tashi nung lir.
Trinamool Congress lenir aser West Bengal Chief Minister Mamata Banerjee-ibo iba senden nung la medentettsü ta metetdaktsüogo, aser Congress Chief Minister temi iba senden nung medenra chief minister 30 shi nungi parnok 10 bo medentettsü.
Bengal CM Banerjee-i Ato kilonser Narendra Modi dang shidi ka ajanga lai land acquisition bill anemba aser jili sentong kar yanglua aliba ajanga iba senden nung medentettsü ta metetdaktsüogo.
Party osang ajangasa ashiba agi, Chief Minister temi Parliamentary Committee dang parnok state temi Bill nung aliba ozüngtem anemer ta shidi temesüktep ajanga metetdaktsüogo, iba den külemi Land Aquisation Bill nung Right to Fair Compensation & Transparency aser Rehabilitation & Resettlement Act, 2013 nung temelenshi malitsüla, ta metetdaktsüogo.